വീട്ടമ്മയുടെ നഗ്‌നചിത്രം 2പേര്‍ അറസ്റ്റില്‍

തിരുവനന്തപുരം: സുഹൃത്തിന്റെ ഭാര്യയുടെ നഗ്നചിത്രം എടുത്തശേഷം അത് പ്രചരിപ്പിയ്ക്കുകയും ഭീഷണിപ്പെടുത്തുകയും ചെയ്ത സംഭവത്തില്‍ രണ്ട് പേരെ വലിയതുറ പൊലീസ് അറസ്റ്റ് ചെയ്തു. വള്ളക്കടവ് പതിനാറുകാല്‍ മണ്ഡപത്തിനുസമീപം സനോഫര്‍ (28), വള്ളക്കടവ് പ്രിയദര്‍ശിനി നഗറില്‍ സജീര്‍ (30) എന്നിവരാണ് പിടിയിലായത്. കേസിലെ മറ്റൊരു പ്രതിയായ അന്‍സാര്‍ ഗള്‍ഫിലേക്ക് രക്ഷപ്പെട്ടുവെന്ന് പൊലീസ് അറിയിച്ചു.

സംഭവത്തെക്കുറിച്ച് പൊലീസ് വിശദീകരിയ്ക്കുന്നത് ഇങ്ങനെയാണ്. സുഹൃത്തായ ഓട്ടോ ഡ്രൈവറുടെ ഭാര്യയെ ഭര്‍ത്താവുമായുള്ള സൗഹൃദം മുതലാക്കി സനോഫര്‍ തന്റെ വീട്ടിലേക്ക് ക്ഷണിച്ചിരുന്നു. മുപ്പതുകാരി വീട്ടിലെത്തിയപ്പോള്‍ ഇവരെ പീഡിപ്പിയ്ക്കുകയും മൊബൈലില്‍ നഗ്ന ചിത്രങ്ങള്‍ പകര്‍ത്തുകയും ചെയ്തു.

പിന്നീട് സനോഫര്‍ ചിത്രങ്ങള്‍ സുഹൃത്തായ അന്‍സാറിനും സജീറിനും കൈമാറി. ഇവര്‍ രണ്ട് പേരും ചിത്രങ്ങള്‍ പുറത്താക്കുമെന്ന് ഭീഷണിപ്പെടുത്തി സ്ത്രീയെ പീഡിപ്പിച്ചു വന്നു.

ഇതിനിടെ സജീറിന്റെ ഭാര്യ ഈ ചിത്രങ്ങള്‍ കണ്ടതോടെയാണ് സംഭവം പുറത്തായത്. ഇവരുടെ ബന്ധു കൂടിയാണ് പീഡിപ്പിക്കപ്പെട്ട വീട്ടമ്മ. ഇവര്‍ ബഹളം വെച്ചതോടെ സംഭവം മറ്റുള്ളവര്‍ അറിയുകയും പിന്നീടിത് കേസാവുകയും ചെയ്തു. ഈ പ്രദേശത്തെ മൊബൈലുകള്‍ ചിത്രം വ്യാപകമായി പ്രചരിയ്ക്കുന്നുണ്ടെന്നാണ് റിപ്പോര്‍ട്ടുകള്‍.