ഗൗരിയമ്മ-തങ്കച്ചന്‍ കൂടിക്കാഴ്ച ചൊവ്വാഴ്ച

തിരുവനന്തപുരം: യുഡിഎഫുമായി ഇടഞ്ഞുനില്‍ക്കുന്ന ജെഎസ്എസ് നേതാവ് കെആര്‍ ഗൗരിയമ്മയുമായി ചൊവ്വാഴ്ച്ച ചര്‍ച്ച നടത്തുമെന്ന് മുന്നണി കണ്‍വീനര്‍ പി പി തങ്കച്ചന്‍ അറിയിച്ചു.

ഗൗരിയമ്മയെ അനുനയിപ്പിക്കാനായി ചര്‍ച്ച നടത്താന്‍ തീരുമാനിച്ച യുഡിഎഫ് കഴിഞ്ഞ യോഗത്തില്‍ തങ്കച്ചനെ ഇതിനായി ചുമതലപ്പെടുത്തുകയായിരുന്നു. ചര്‍ച്ച വിജയമായിരിക്കുമെന്നാണ് പ്രതീക്ഷയെന്ന് പി പി തങ്കച്ചന്‍ പറഞ്ഞു.

യോഗതീരുമാനം അറിഞ്ഞ ഗൗരിയമ്മ തന്നെ ആര്‍ക്കും എപ്പോഴും വന്ന് കാണാമെന്നും താനൊരിക്കലും കോണ്‍ഗ്രസിനെതിരെ പ്രവര്‍ത്തിച്ചിട്ടില്ലെന്നും വ്യക്തമാക്കിയിരുന്നു. ഗൗരിയമ്മ യുഡിഎഫിനോട് കലാപം പ്രഖ്യാപിച്ചിരിക്കുകയാണെങ്കിലും ജെഎസ്എസിലെ ഒരു പക്ഷത്തിന് യുഡിഎഫില്‍ നിന്നും അകലുന്നതിനോട് താല്‍പര്യമില്ല.

പി പി തങ്കച്ചന്‍ ഗൗരിയമ്മയെ സന്ദര്‍ശിക്കുന്നതില്‍ അവര്‍ക്ക് താത്പര്യമുണ്ടോയെന്ന കാര്യം ജെഎസ്എശ് നേതാവ് രാജന്‍ബാബു അവരുമായി സംസാരിച്ചശേഷം അറിയിക്കണമെന്ന് കോണ്‍ഗ്രസ് നേതാക്കള്‍ നിര്‍ദേശിച്ചിരുന്നു.

ഈ നിര്‍ദേശത്തോടുള്ള ഗൗരിയമ്മയുടെ പ്രതികരണം അനുകൂലമാണെന്ന് രാജന്‍ബാബു നേതാക്കളെ അറിയിച്ചിരുന്നു. ഇതിന്റെ അടിസ്ഥാനത്തിലാണ് പി പി തങ്കച്ചന്‍ ഗൗരിയമ്മയെ കാണുന്നത്.