യുവതിയുടെ ആത്മഹത്യ: കാരണം അശ്ലീല ചിത്രം

ചെറുതുരുത്തി: ദേശമംഗല സ്വദേശിയായ പത്തൊന്‍പതുകാരി തീകൊളുത്തി ആത്മഹത്യചെയ്തത് കാമുകന്‍ അശ്ലീലചിത്രങ്ങള്‍ എടുത്ത് പ്രചരിപ്പിച്ചത് മൂലമാണെന്ന് പൊലീസ് നിഗമനം.

നവംബര്‍ 30ന് ചൊവ്വാഴ്ചയാണ് പൊള്ളലേറ്റ് ചികിത്സയിലായിരുന്ന ഷിനു എന്ന പെണ്‍കുട്ടി മരിച്ചത്. സംഭവവുമായി ബന്ധപ്പെട്ട് ദേശമംഗലത്ത് മൊബൈല്‍ ഫോണ്‍ കട നടത്തുന്ന പ്രവീണി(21)നെ പൊലീസ് അറസ്റ്റുചെയ്തു.

കാമുകന്‍ മൊബൈലില്‍ അശ്ലീല ചിത്രങ്ങള്‍ പകര്‍ത്തി കൂട്ടുകാര്‍ക്ക് കാണിച്ചതായി പെണ്‍കുട്ടി മരണമൊഴി നല്‍കിയിരുന്നു. വ്യാഴാഴ്ച പ്രവീണിന്റെ കൂട്ടുകാരായ ചിലരെയും പോലീസ് കസ്റ്റഡിയിലെടുത്ത് ചോദ്യം ചെയ്തിരുന്നു.

പ്രവീണ്‍ യുവതിയേയും കൂട്ടി കാഞ്ഞിരശ്ശേരിയിലെ ഒരു വീട്ടിലെത്തി ശാരീരികബന്ധത്തില്‍ ഏര്‍പ്പെട്ട ശേഷം ദൃശ്യങ്ങള്‍ മൊബൈലില്‍ പകര്‍ത്തികുകയായിരുന്നുവത്രേ.

ഇത് കൂട്ടുകാരെ കാണിച്ചത് പുറത്തറിഞ്ഞ യുവതി പ്രവീണിനോട് വിവാഹം കഴിക്കാന്‍ ആവശ്യപ്പെട്ടെങ്കിലും അയാള്‍ കയ്യൊഴിയുകയായിരുന്നു. ഇതില്‍ മനം നൊന്താണ് സ്വയം മണ്ണെണ്ണയൊഴിച്ച് തീകൊളുത്തിയത്.

പ്രവീണിനോടൊപ്പം ഇതിന് കൂട്ടുനിന്ന കൂട്ടുകാരനായ കറ്റുവട്ടൂര്‍ കാവത്തുപറമ്പില്‍ നൗഷാദി (26)നെതിരെയും പോലീസ് പ്രേരണക്കുറ്റം ചുമത്തി കേസെടുത്തിട്ടുണ്ട്.