പെട്രോള്‍ ലിറ്ററിന് 2 രൂപ കൂടിയേക്കും

ദില്ലി: അന്താരാഷ്ട്ര വിപണയില്‍ ഇന്ധന വില കുത്തനെ ഉയര്‍ന്നതിനെ തുടര്‍ന്ന് രാജ്യത്തെ പെട്രോള്‍, ഡീസല്‍ വിലയില്‍ വര്‍ദ്ധന വരുത്താന്‍ പെട്രോളിയം കമ്പനികള്‍ ആലോചിയ്ക്കുന്നു. പെട്രോളിനും ഡീസലിനും ലിറ്ററിന് കുറഞ്ഞത് രണ്ട് രൂപയെങ്കിലും വര്‍ദ്ധിപ്പിയ്ക്കാനാണ് നീക്കം നടക്കുന്നത്.

ക്രൂഡ് ഓയില്‍ ബാരലിന് 90 ഡോളറായാണ് ഉയര്‍ന്നിരിയ്ക്കുന്നത്. കഴിഞ്ഞ രണ്ട് വര്‍ഷത്തെ ഏറ്റവും ഉയര്‍ന്ന നിരക്കാണിത്. ഇത് ചൂണ്ടിക്കാട്ടിയാണ് ഇന്ധന വില വര്‍ദ്ധിപ്പിയ്ക്കാന്‍ തീരുമാനിച്ചിരിയ്ക്കുന്നത്.

ഇന്ധന വില നിര്‍ണയിയ്ക്കാനുള്ള അവകാശം കഴിഞ്ഞ ജൂണ്‍ 26ന് പെട്രോളിയം കമ്പനികള്‍ക്ക് സര്‍ക്കാര്‍ നല്‍കിയിരുന്നു.

പൊതുമേഖലയിലുള്ള ഹിന്ദുസ്ഥാന്‍ പെട്രോളിയവും ഭാരത് പെട്രോളിയവുമാണ് രാജ്യത്തെ 90 ശതമാനം വരുന്ന ഇന്ധന വിപണി നിയന്ത്രിയ്ക്കുന്നത്. വില നിര്‍ണയിക്കാനുള്ള അവകാശം ലഭിച്ചതിന് ശേഷം ഈ കമ്പനികള്‍ നാല് തവണ പെട്രോള്‍ വില വര്‍ദ്ധിപ്പിച്ചിരുന്നു.