ജെഎസ്എസ് ഓഫീസ് അടച്ചിട്ടനിലയില്
ആലപ്പുഴ: ജെഎസ്എസ് നേതാവ് കെആര് ഗൗരിയമ്മ സിപിഎമ്മിലേയ്ക്ക് പോകുമോ അതോ യുഡിഎഫില് തന്നെ തുടരുമോ എന്നതുസംബന്ധിച്ച് അനിശ്ചിതത്വം തുടരവേ പാര്ട്ടി ഓഫീസ് പൂട്ടിയിട്ടത് ചര്ച്ചയായി.
ജെഎസ്എസ് സംസ്ഥാന കമ്മിറ്റി ഓഫീസ് വെള്ളിയാഴ്ച മുഴുവന് പൂട്ടിക്കിടക്കുകയായിരുന്നു. സംസ്ഥാന കമ്മിറ്റി ഓഫീസും ജില്ലാ കമ്മിറ്റി ഓഫീസും പ്രവര്ത്തിക്കുന്ന ആലപ്പുഴ കെഎസ്ആര്ടിസി ബസ് സ്റ്റാന്ഡിനു സമീപത്തെ കെട്ടിടമാണ് താഴിട്ടു പൂട്ടിയിരിക്കുന്നത്.
ഓഫീസ് താല്കാലികമായി പൂട്ടിയതാവാമെന്ന് ഒരു വിഭാഗം പറയുമ്പോള് ഓഫീസ് സെക്രട്ടറി സ്ഥലത്തില്ലായിരുന്നുവെന്ന് മറുവിഭാഗവും പറയുന്നു. എന്നാല്, ഓഫീസ് സെക്രട്ടറിക്കു പുറമെ മറ്റൊരു ജീവനക്കാരനുമുള്ള ഓഫീസ് ദിവസവും രാവിലെ തുറക്കാറുള്ളതാണ്.
വൈകിട്ട് ഓഫീസ് അടച്ചശേഷം ഓഫീസ് ജീവനക്കാരന് താക്കോല് ചാത്തനാട്ടെ ഗൌരിയമ്മയുടെ വീട്ടില് ഏല്പിക്കുകയാണ് പതിവ്. കഴിഞ്ഞ വ്യാഴാഴ്ച രാത്രിയും ഇങ്ങനെ താക്കോല് ഗൗരിയമ്മയെ ഏല്പ്പിച്ചതാണ്. എന്നാല് വെള്ളിയാഴ്ച ആരും ഓഫീസ് തുറന്നില്ല.
ജെഎസ്എസില് ഇതിനകം തന്നെ രണ്ടു ഗ്രൂപ്പുകള് ഉരുത്തിരിഞ്ഞിട്ടുണ്ട്. ഒരു ഗ്രൂപ്പ് ഗൗരിയമ്മ യുഡിഎഫില്ത്തന്നെ ഉറച്ചുനില്ക്കണമെന്നാഗ്രഹിക്കുമ്പോള് മറ്റൊരു ഗ്രൂപ്പ് സിപിഎമ്മിലേയ്ക്ക് മടങ്ങണമെന്ന് ആവശ്യപ്പെടുന്നവരാണ്. ഈ അഭിപ്രയാവ്യത്യാസം ശക്തമായി തുടരുന്നതിനിടെ ഓഫീസ് ഒരു ദിവസം മുഴുവന് അടഞ്ഞുകിടന്നത് അഭ്യൂഹങ്ങള്ക്കിടനല്കിയിരിക്കുകയാണ്.
അതേസമയം, ജെഎസ്എസ് യുഡിഎഫില് തുടരണോയെന്നതിനെ ക്കുറിച്ച് തീരുമാനമെടുക്കാന് പാര്ട്ടി പ്ളീനം ജനുവരി ഒന്പതിന് നിശ്ചയിച്ചിരിക്കുകയാണ്.