ലോട്ടറി: സിബിഐ അന്വേഷണത്തിന് ആവശ്യപ്പെടും

തിരുവനന്തപുരം: ലോട്ടറിക്കേസില്‍ സിബിഐ അന്വേഷണത്തിന് മാനദണ്ഡപ്രകാരം കേന്ദ്രത്തോട് ആവശ്യപ്പെടുമെന്നു മുഖ്യമന്ത്രി വി.എസ്. അച്യുതാനന്ദന്‍. ലോട്ടറിക്കേസ് സിബിഐ അന്വേഷിക്കണമെങ്കില്‍ കേരളം മാനദണ്ഡപ്രകാരം ആവശ്യപ്പെടണമെന്നു കേന്ദ്രം വ്യക്തമാക്കിയിട്ടുള്ളതിനാല്‍ അങ്ങനെ ആവശ്യപ്പെടുമോ എന്ന് ചോദിപ്പോഴായിരുന്നു വിഎസിന്റെ മറുപടി.

അനെര്‍ട്ടിലെ പിന്‍വാതില്‍ നിയമനത്തില്‍ തന്റെ പൊളിറ്റിക്കല്‍ സെക്രട്ടറി സി പി നാരായണനു പങ്കുണ്ടെന്ന വാര്‍ത്തകള്‍ മുഖ്യമന്ത്രി നിഷേധിച്ചു.

അന്തരിച്ച ഒളിമ്പ്യന്‍ മുരളിക്കുട്ടന്റെ ഭാര്യയും അര്‍ജുന അവാര്‍ഡ് ജേതാവും ഒളിമ്പ്യനുമായ മേഴ്‌സിക്കുട്ടന് എറണാകുളം ജില്ലയിലെ മരടില്‍ 10 സെന്റ് സ്ഥലം വീടുനിര്‍മിക്കാന്‍ നല്‍കാനും മന്ത്രിസഭാ യോഗത്തില്‍ തീരുമാനമായി.

കൂടാതെ ആറളം ഫാമിങ് കോര്‍പ്പറേഷന്‍ ലിമിറ്റഡിലെ തൊഴിലാളികളുടെ ശമ്പളപരിഷ്‌കരണം 2010 ജനുവരി ഒന്നിന്റെ മുന്‍കാല പ്രാബല്യത്തോടെ നടപ്പാക്കാനും തീരുമാനിച്ചു.