ബെക്കാമിന്റെ കാര്‍ ഇബെയില്‍ ലേലത്തിന്

ലണ്ടന്‍: ഫുട്‌ബോളിലെ താരം ഡേവിഡ് ബെക്കാമിന്റെ കാര്‍ വില്‍പ്പനയ്ക്ക്. ബെക്കാം 2008ല്‍ 100,000 ഡോളര്‍ നല്‍കി വാങ്ങിയ കറുത്ത പോര്‍ഷെ കാറാണ് വില്‍പനയ്ക്ക് വച്ചിരിക്കുന്നത്. ഓണ്‍ലൈന്‍ ലേല സ്ഥലമായ ഇ ബേയില്‍ നിന്ന് ആവശ്യമുള്ളവര്‍ക്ക് കാര്‍ സ്വന്തമാക്കാം.

കാര്‍ വാങ്ങിയ ശേഷം അമ്പതിനായിരം ഡോളര്‍ കൂടി മുടക്കി ബെക്കാം അതിന് വേണ്ട പരിഷ്‌കാരങ്ങള്‍ വരുത്തിയിരുന്നു. സ്വന്തം ജഴ്‌സി നമ്പരായ 23 എന്ന അക്കം ലതര്‍ സീറ്റുകളിലും മറ്റും തുന്നിച്ചേര്‍ത്ത് സര്‍വ്വത്ര ബെക്കാം മുദ്ര പതിപ്പിച്ച പോര്‍ഷെയാണ് ഇപ്പോള്‍ ലേലത്തിനെത്തിയിരിക്കുന്നത്.

ചെക്വേര്‍ഡ് എന്ന കമ്പനിയാണ് 134,000 ഡോളര്‍ വിലയിട്ട് കാര്‍ ലേലം ചെയ്യുന്നത്. ബെക്കാമിന്റെയും ഭാര്യ വിക്ടോറിയയുടെയും കാര്‍ കമ്പം പ്രസിദ്ധമാണ്.

ഇവരുടെ കുട്ടികള്‍ സ്‌കൂളില്‍ പോകാനും വരാനും ഉപയോഗിക്കുന്നത് റോള്‍സ് റോയ്‌സ് കാറാണ്. കറുപ്പും വെളുപ്പും നിറത്തിലുള്ള രണ്ട് മുന്തിയ മോഡല്‍ പോര്‍ഷെകളും ഒരു കാഡിലാക് എസ്‌കലേഡും ഈ സെലിബ്രിറ്റി ദമ്പതികള്‍ക്ക് സ്വന്തമായുണ്ട്.

English summary

Soccer star David Beckham is reportedly selling his Porsche sports car worth $150,000 on internet auction site eBay.