ചൈനയ്ക്ക് സ്‌റ്റെല്‍ത്ത് പോര്‍വിമാനങ്ങള്‍

ബെയ്ജിങ്: റഡാറുകളുടെ കണ്ണുവെട്ടിയ്ക്കാന്‍ കഴിവുള്ള അത്യാധുനിക സ്റ്റെല്‍ത്ത് പോര്‍വിമാമനം ചൈനയ്ക്ക് സ്വന്തമായി. ജെ 20 എന്ന് പേരിട്ടിരിയ്ക്കുന്ന വിമാനത്തിന്റെ 20 മിനിറ്റ് നീണ്ട പരീക്ഷണപ്പറക്കല്‍ വിജയകരമായിരുന്നുവെന്ന് ചൈനീസ് പ്രതിരോധവൃത്തങ്ങള്‍ അറിയിച്ചു.

അമേരിക്ക കഴിഞ്ഞാല്‍ ഈ മോഡല്‍ യുദ്ധവിമാനം സ്വന്തമാക്കുന്ന ആദ്യരാജ്യമാണ് ചൈന. യുഎസ് പ്രതിരോധസെക്രട്ടറി റോബാര്‍ട്ട് ഗേറ്റ്‌സ് ചൈന സന്ദര്‍ശിക്കുന്നതിനിടയിലാണ് ഈ കന്നിപ്പറക്കല്‍ അരങ്ങേറിയത്. എന്നാല്‍ ചൈനയുടെ സ്‌റ്റെല്‍ത്ത് സാങ്കേതിക വിദ്യ അമേരിക്കയ്ക്ക് ഭീഷണിയല്ലെന്ന് ഗേറ്റ്‌സ് പറഞ്ഞു.

പരീക്ഷണപ്പറക്കലിന്റെ വാര്‍ത്ത ആദ്യം വെബ്‌സൈറ്റുകളിലാണ് പ്രത്യക്ഷപ്പെട്ടത്. പിന്നീട് റോബര്‍ട്ട്‌ഗേറ്റ്‌സുമായുള്ള കൂടിക്കാഴ്ചയ്ക്കിടെ ചൈനയുടെ പ്രസിഡന്റ് ഹൂ ജിന്താവോ പരീക്ഷണ വിവരം സ്ഥിരീകരിക്കുകയായിരുന്നു

റഡാര്‍, ഇന്‍ഫ്രാറെഡ്, സോണാര്‍ നിരീക്ഷണ സംവിധാനങ്ങളെ കബളിപ്പിക്കാന്‍ ശേഷിയുള്ളതാണ് സ്‌റ്റെല്‍ത്ത് പോര്‍ വിമാനങ്ങള്‍.ലോകത്തിപ്പോള്‍ പൂര്‍ണമായും പ്രവര്‍ത്തന സജ്ജമായ ഒരു സ്‌റ്റെല്‍ത്ത് പോര്‍വിമാനമേയുള്ളൂ. അമേരിക്കയുടെ എഫ്20 (റാപ്റ്റര്‍) വിമാനങ്ങള്‍.

സുഖോയ് പുതിയ മോഡല്‍ വിമാനങ്ങളില്‍ സ്‌റ്റെല്‍ത്ത് സാങ്കേതിക വിദ്യ പ്രയോജനപ്പെടുത്താന്‍ റഷ്യയും ഇന്ത്യയും പരീക്ഷണങ്ങള്‍ നടത്തുന്നുണ്ട്.