മാര്‍ട്ടിനെയും വാണിഭക്കാരെയും ഒതുക്കും: വിഎസ്

തിരുവനന്തപുരം: ലോട്ടറി രാജാവ് സാന്റിയാഗോ മാര്‍്ട്ടിനെപ്പോലെയുള്ളവരെ ഒതുക്കുന്നതില്‍ തന്റെ പാര്‍ട്ടി തനിക്കെതിരല്ലെന്ന് മുഖ്യമന്ത്രി വിഎസ് അച്യുതാനന്ദന്‍. തനിക്കെതിരെ പിബി എന്തെങ്കിലും നടപടി സ്വീകരിച്ചതായി അറിയില്ലെന്നും അദ്ദേഹം വ്യക്തമാക്കി.

ലോട്ടറി കേസില്‍ പാര്‍ട്ടിയും വിഎസും രണ്ടു തട്ടിലാണോയെന്ന ചോദ്യത്തോട് പ്രതികരിക്കുകയായിരുന്നു വിഎസ്.

വിഎസ് സര്‍ക്കാര്‍ നിലനില്‍ക്കുന്നിടത്തോളം കാലം മാര്‍ട്ടിന്റെ കൊള്ളനടക്കില്ല. പാര്‍ട്ടിയും സര്‍ക്കാരുമായി ഒരു ഏകോപനക്കുറവും ഉള്ളതായി തോന്നുന്നില്ല. എന്തുകാര്യമായാലും ജനനന്മ അടിസ്ഥാനമാക്കിയാണു തീരുമാനം എടുക്കുന്നത്.

കേരളത്തിലെ ജനങ്ങള്‍ക്കു ശുദ്ധജലം, വൈദ്യുതി എന്നിവ എത്തിക്കുക, കൃഷിക്കാരെ നെല്‍ക്കൃഷിയില്‍ ഉറപ്പിച്ചു നിര്‍ത്തുക തുടങ്ങി പല കാര്യങ്ങളിലും ജനങ്ങള്‍ക്കുവേണ്ടിയാണു തീരുമാനങ്ങള്‍ എടുത്തിട്ടുള്ളത്-വിഎസ് ചൂണ്ടിക്കാട്ടി.

പെണ്‍വാണിഭക്കാരെ കയ്യാമം വച്ച് റോട്ടിലൂടെ നടത്തുമെന്ന മുന്‍ വാഗ്ദാനത്തെക്കുറിച്ച് ചോദിച്ചപ്പോള്‍ നിങ്ങള്‍ വ്യഗ്രത കാട്ടാതെ, ഈ ഗവണ്‍മെന്റിന്റെ കാലത്തുതന്നെ അത് സംഭവിക്കും. ഈ ഗവണ്‍മെന്റിന്റെ കാലാവധി തീരുന്നതിന് മുമ്പ് അത്തരക്കാരെ തെരുവിലൂടെ കൈയാമം വെച്ചുകൊണ്ടുപോകുന്നത് നിങ്ങള്‍ക്ക് കാണാന്‍ കഴിയുമെന്നായിരുന്നു വിഎസിന്റെ മറുപടി.

വിഎസിനെ ശാസിക്കാനുള്ള പിബി തീരുമാനം എങ്ങനെ ചോര്‍ന്നുവെന്ന ചോദ്യത്തിന്, ഉണ്ടാകാത്ത നടപടി എങ്ങനെ ചോരുമെന്ന മറുചോദ്യമായാണ് വിഎസ് ചോദിച്ചത്. .