പരിപ്പ് വിലയും ഏറുന്നു

മുംബൈ: ഉള്ളിയ്ക്കും മുട്ടയ്ക്കും പിന്നാലെ രാജ്യത്ത് പരിപ്പ്-പയറ് വിലയും മേലോട്ട് കുതിയ്ക്കുന്നു. മൊത്തവ്യാപാര മേഖലയില്‍ പരിപ്പ് കിലോയ്ക്ക് 75 രൂപയ്ക്കാണ് വില്‍ക്കുന്നത്. ചെറുകിട കച്ചവടക്കാരില്‍ എത്തുമ്പോള്‍ ഇത് 85 രൂപ വരെയായി ഉയരുന്നുണ്ട്. തുവരപരിപ്പ്, ഉഴുന്ന് പരിപ്പ്, ചെറു പയര്‍ തുടങ്ങിയവയുടെ എല്ലാം വില കുത്തനെ കൂടിയിട്ടുണ്ട്.

ഏതാനും ആഴ്ചകള്‍ക്കുള്ളിലാണു വില കുത്തനെ ഉയര്‍ന്നത്. ശൈത്യത്തിന്റെ കാഠിന്യമേറിയതോടെ പരിപ്പ് കൃഷിയ്ക്ക് വന്‍നാശം സംഭവിച്ചിരുന്നു. പരിപ്പ് കൃഷിക്ക് 15 ഡിഗ്രിയില്‍ താഴെ താപനില വരാന്‍ പാടില്ല. എന്നാല്‍ ഉത്തരേന്ത്യയില്‍ പലയിടത്തും താപനില ഇതിനും വളരെ താഴെയാണ്.

വില വര്‍ധിക്കാന്‍ തുടങ്ങിയതോടെ കരിഞ്ചന്തക്കാരും വിപണിയില്‍ സജീവമായിട്ടുണ്ട്. വന്‍തോതില്‍ പൂഴ്ത്തിവെപ്പ് നടക്കുന്നതും പരിപ്പ് വില ഏറാന്‍ കാരണമായിട്ടുണ്ട്.