ഐസ്‌ക്രീം കേസ്: മൊഴിമാറ്റ രേഖകള്‍ പുറത്ത്

കൊച്ചി: ഐസ്‌ക്രീം പാര്‍ലര്‍ കേസില്‍ റജീനയും റജുലയും മൊഴിമാറ്റിയത് സംബന്ധിച്ച രേഖകള്‍ കുഞ്ഞാലിക്കുട്ടിയുടെ ബന്ധു കെഎ റൗഫ് പുറത്തുവിട്ടു.

രജീനയും റജുലയും മൊഴിമാറ്റാനായി അഞ്ച് ലക്ഷം രൂപ കൈപ്പറ്റിയതിലേക്ക് നയിച്ച കരാര്‍ രേഖയാണ് പുറത്തുവന്നിരിക്കുന്നത്.

ഐസ്‌ക്രീം പാര്‍ലര്‍ പെണ്‍വാണിഭക്കേസ് പുറത്തുവന്നപ്പോള്‍ പീഡനത്തിന് ഇരയായ റജീനയും റജുലയും കോഴിക്കോട് കുന്നമംഗലം മജിസ്‌ട്രേട്ട് കോടതിയില്‍ എത്തി ക്രിമിനല്‍ നടപടിക്രമം അനുസരിച്ച് മൊഴി നല്‍കിയിരുന്നു.

ഈമൊഴി കുഞ്ഞാലിക്കുട്ടിയ്‌ക്കെതിരാണ്. എന്നാല്‍ ഈ മൊഴികള്‍ അപകടത്തിലേക്ക് നയിക്കുമെന്ന് അറിഞ്ഞപ്പോള്‍ മൊഴിമാറ്റി പറയാന്‍ പെണ്‍കുട്ടികളില്‍ സമ്മര്‍ദ്ദം ഉണ്ടായി. കുഞ്ഞാലിക്കുട്ടിയെ രക്ഷിക്കാന്‍ റൗഫും സംഘവും രംഗത്തെത്തി.

റജീനയും റജുലയും തുടര്‍ന്ന് മജിസ്‌ട്രേട്ട് കോടതിയില്‍ മൊഴി മാറ്റി കുഞ്ഞാലിക്കുട്ടിയെ രക്ഷിച്ചുവെന്നാണ് റൗഫ് വെളിപ്പെടുത്തിയത്.

മൊഴിമാറ്റിപ്പറയാം എന്ന് രണ്ടുപേരും കോഴിക്കോട്ടെ ഒരു അഭിഭാഷകന്‍ മുമ്പാകെ ഒപ്പിട്ട് സത്യവാങ്മൂലവും നല്‍കിയിരുന്നു. രണ്ട് പേരും തങ്ങളുടെ പേരില്‍ വാങ്ങിയ മുദ്രപ്പത്രമാണ് അതിന് ഉപയോഗിച്ചത്. ഇതിനുശേഷമാണ് മൊഴിമാറ്റിപ്പറയാന്‍ മജിസ്‌ട്രേട്ട് മുമ്പാകെ വീണ്ടും ഹാജരായത്.

കെ. അജിതയുടെ നിര്‍ബന്ധപ്രകാരമാണ് കുഞ്ഞാലിക്കുട്ടിക്ക് എതിരെ മൊഴി നല്‍കിയതെന്നാണ് റജീന മൊഴി മാറ്റിയശേഷം പറഞ്ഞിരുന്നത്. കേസ് വിചാരണ ചെയ്തപ്പോള്‍ റജീനയും റജുലയും പ്രോസിക്യൂഷന്‍ സാക്ഷികള്‍ ആയിരുന്നു. വിചാരണ കോടതിയില്‍ ഇരുവരും കുഞ്ഞാലിക്കുട്ടിക്ക് എതിരെ ശബ്ദിച്ചില്ല.

ഐസ്‌ക്രീം പാര്‍ലര്‍ കേസ് അട്ടിമറിക്കാന്‍ ശ്രമം തുടങ്ങിയത് ഈ മൊഴിമാറ്റത്തിലൂടെയായിരുന്നുവെന്ന് റൗഫ് വ്യക്തമാക്കുന്നു.

മൊഴിമാറ്റി കുഞ്ഞാലിക്കുട്ടിയെ രക്ഷിക്കാന്‍ റജീനയ്ക്ക് 2.6 ലക്ഷംരൂപയും റജുലക്ക് 3 ലക്ഷം രൂപയും നല്‍കിയെന്നാണ് കെ.എ. റൗഫ് കഴിഞ്ഞദിവസം കോഴിക്കോട്ട് വെളിപ്പെടുത്തിയത്.