ഐസ്‌ക്രീം: ലീഗിന് വിഎസിന്റെ മറുപടി

തിരുവനന്തപുരം: പെണ്‍വാണിഭക്കാരെയും കൊള്ളക്കാരെയും നിയമത്തിന് മുന്നില്‍ കൊണ്ടുവരാന്‍ എന്നും ശക്തമായ നിലപാടാണ് സ്വീകരിച്ചിരിക്കുന്നതെന്ന് മുഖ്യമന്ത്രി വി.എസ്.അച്യുതാനന്ദന്‍. പെണ്‍വാണിഭക്കാര്‍ക്കെതിരെ സ്വീകരിയ്ക്കുന്ന നടപടികളില്‍ ബേജാറിലായ ചിലരാണ് ഇത്തരം ആരോപണങ്ങള്‍ക്ക് പിന്നിലെന്നും മുഖ്യമന്ത്രി പറഞ്ഞു.

മുഖ്യമന്ത്രിയുടെ ഓഫീസാണ് കുഞ്ഞാലിക്കുട്ടിക്കെതിരെയുള്ള പുതിയ ഗൂഢാലോചനയുടെ കേന്ദ്രമെന്ന മുസ്‌ലീം ലീഗ് നേതൃത്വത്തിന്റെ പ്രസ്താവനയോട് പ്രതികരിക്കുകയായിരുന്നു മുഖ്യമന്ത്രി.

ഐസ്‌ക്രീം വിവാദത്തില്‍ ശനിയാഴ്ച നിലപാട് മാറ്റിയ ലീഗ് നേതൃത്വം ഗൂഢാലോചനയ്ക്ക് പിന്നില്‍ മുഖ്യമന്ത്രിയുടെ ഓഫീസാണെന്ന് ആരോപിച്ചിരുന്നു. വിവാദത്തിലേക്ക് സിപിഎമ്മിനെയും വലിച്ചിഴയ്ക്കുകയെന്ന തന്ത്രമാണ് ഇതിന് പിന്നിലെന്നാണ് വിലയിരുത്തലുകള്‍.

ലീഗിന്റെ ആരോപണത്തിനെതിരെ ആഭ്യന്തര മന്ത്രി കോടിയേരി ബാലകൃഷ്ണനും നേരത്തെ പ്രതികരിച്ചിരുന്നു. ഗൂഢാലോചനയെക്കുറിച്ച് അറിവുണ്ടായിരുന്നെങ്കില്‍ എന്തുകൊണ്ട് ഉമ്മന്‍ ചാണ്ടി അത് പൊലീസിനെ അറിയിച്ചില്ലെന്ന് അദ്ദേഹം ചോദിച്ചു. തെളിവുകള്‍ ഹാജരാക്കിയാല്‍ ഇതേപ്പറ്റി അന്വേഷിയ്ക്കാമെന്നും കോടിയേരി വ്യക്തമാക്കി.