കുഞ്ഞാലിക്കുട്ടിക്കെതിരെ അന്വേഷണം തുടങ്ങി

തിരുവനന്തപുരം: ഐസ്‌ക്രീം പാര്‍ലര്‍ പീഡനക്കേസില്‍ മുന്‍മന്ത്രി പികെ. കുഞ്ഞാലിക്കുട്ടിക്കെതിരെ തിരുവനന്തപുരം ഫോര്‍ട്ട് പോലീസ് കേസെടുത്തു. തിരുവനന്തപുരം സിജെഎം കോടതി നിര്‍ദേശത്തെ തുടര്‍ന്നാണ് കുഞ്ഞാലിക്കുട്ടിയെ ഒന്നാം പ്രതിയാക്കി കേസെടുത്തത്. കേസ്‌സംബന്ധിച്ച പ്രഥമ വിവര റിപ്പോര്‍ട്ട് പോലീസ്, മജിസ്‌ട്രേട്ട് കോടതിയില്‍ സമര്‍പ്പിച്ചു.

പ്രായപൂര്‍ത്തിയാകാത്ത പെണ്‍കുട്ടിയെ ബലാത്സംഗം ചെയ്തു, തെളിവുകള്‍ നശിപ്പിച്ചു, ഗൂഢാലോചനയില്‍ ഏര്‍പ്പെട്ടു തുടങ്ങിയ കുറ്റങ്ങളാണ് മുന്‍മന്ത്രിക്കെതിരെ എഫ്‌ഐആറില്‍ ആരോപിച്ചിരിക്കുന്നത്.

വള്ളക്കടവ് സ്വദേശി എഫ്. പ്രദീപ്ലാല്‍ നല്‍കിയ സ്വകാര്യ ഹര്‍ജിയെത്തുടര്‍ന്നാണു കേസ്. ഇതിനിടെ ഹര്‍ജിക്കാരനെതിരെ കുഞ്ഞാലിക്കുട്ടി മാനനഷ്ടത്തിനു വക്കീല്‍ നോട്ടീസും അയച്ചു. സുപ്രീംകോടതി നിയമിച്ച അന്വേഷണ സംഘത്തലവന്‍ എന്ന നിലയില്‍ അന്നത്തെ ഐജിയും ഇന്നത്തെ ഡിജിപിയുമായ ജേക്കബ് പുന്നൂസ്, മറ്റൊരു ഐജി ശേഖരന്‍ മിനികോടന്‍ എന്നിവര്‍ അന്വേഷിച്ചു തനിക്കു പങ്കില്ലെന്നു വ്യക്തമാക്കിയ സംഭവത്തില്‍ വ്യാജ പരാതി നല്‍കി എന്ന പേരിലാണു കുഞ്ഞാലിക്കുട്ടിയുടെ നോട്ടീസ്.