ഇന്റര്‍നെറ്റില്‍ ഹസാരെ തരംഗം

ദില്ലി: അഴിമതിയ്‌ക്കെതിരെ കുരിശുയുദ്ധം പ്രഖ്യാപിച്ച് ഗാന്ധിയന്‍ അന്നാ ഹസാരെ നടത്തുന്ന സമരത്തിലേക്ക് ഇന്ത്യന്‍ യുവത്വം ആകര്‍ഷിയ്ക്കപ്പെടുന്നു. പൊതുവെ രാഷ്ട്രീയസമരങ്ങളിലും മറ്റു സാമൂഹികപ്രശ്‌നങ്ങളിലും ഇടപെടാത്ത മെട്രോനഗരങ്ങളിലെ യുവതയാണ് ഹസാരെയ്ക്ക് പിന്തുണയുമായി രംഗത്തെത്തുന്നതെന്നും ശ്രദ്ധേയം. സോഷ്യല്‍ നെറ്റ് വര്‍ക്കിങ് സൈറ്റുകളിലും മൊബൈലുകളും ഹസാരെയ്ക്ക് പിന്തുണ പ്രഖ്യാപിയ്ക്കുന്ന സന്ദേശങ്ങളാല്‍ നിറയുകയാണ്. ഇന്റര്‍നെറ്റിന്റെ പ്രധാന ഉപയോക്താക്കളായ യുവതീയുവാക്കളെയാണ് ഹസാരെ തരംഗം ആവേശിച്ചിരിയ്ക്കുന്നത്.

ഗൂഗിള്‍ ഇന്ത്യ പേജില്‍ ഏറ്റവും തിരയുന്ന വാക്കുകളിലൊന്നായി അന്നാ ഹസാരെയായി മാറിക്കഴിഞ്ഞു. ഹസാരെയുടെ നിരാഹാരം നാലാംദിനത്തിലേക്ക് കടക്കുമ്പോള്‍ അദ്ദേഹത്തിന്റെ പേരിലുള്ള 'ഇന്ത്യ എഗന്‍സ്റ്റ് കറപ്ഷന്‍' എന്ന ഫേസ്ബുക്ക് അക്കൗണ്ടിന് വെള്ളിയാഴ്ച രാവിലെ 137,679 ഫോളോവേഴ്‌സിനെയാണ് ലഭിച്ചത്.

ട്വിറ്ററില്‍ ജന്‍ലോക്പാല്‍ എന്ന അക്കൌണ്ടിലാണ് അന്നാ ഹസാരെയ്ക്ക് വേണ്ടി പൊതുജനങ്ങളുടെ പിന്തുണ തേടുന്നത്. ഓരോ മിനിട്ടിലും നൂറുകണക്കിന് ട്വീറ്റുകളാണ് എഴുപത്തിരണ്ടുകാരനായ ഹസാരെയ്ക്ക് വേണ്ടി കുറിയ്ക്കപ്പെടുന്നത്. എഴുപത്തിരണ്ടുകാരനായ ഗാന്ധിയന് വേണ്ടി ലോകമെങ്ങുമുള്ള സെലിബ്രറ്റികളും ട്വിറ്ററിലൂടെ പിന്തുണപ്രഖ്യാപിയ്ക്കുന്നു. ഗ്രൂപ്പ് എസ്എംഎസുകളും ഗാന്ധിയന്‍ സമരത്തിന്റെ തീവ്രത വര്‍ദ്ധിപ്പിയ്ക്കുന്നുണ്ട്.

ഈജിപ്റ്റില്‍ മുല്ലപ്പൂ വിപ്ലവത്തിന് വഴിയൊരുക്കിയ ഇന്റര്‍നെറ്റ് ഇന്ത്യയില്‍ ഗാന്ധിയന്‍ സത്യഗ്രഹത്തിന്റെ വിജയത്തിന് നിദാനമാകുമോയെന്നാണ് ലോകം ആകാംക്ഷയോടെ ഉറ്റുനോക്കുന്നത്.

English summary

Anna Hazare's fight against corruption is spreading like wildfire on the internet. He has become the most searched on the Google India page.