തദ്ദേശവകുപ്പ് വിഭജനം പുനപരിശോധിക്കില്ല: ചാണ്ടി
വകുപ്പ് വിഭജനം ഭരണത്തിന് ഗുണം ചെയ്യും. വകുപ്പ് വിഭജനം ഒരു തരത്തിലും ഭരണത്തെ ബാധിക്കില്ലെന്നും മറ്റ് ബുദ്ധിമുട്ടുകള് ഉണ്ടാകാനിടയില്ലെന്നും മുഖ്യമന്ത്രി പറഞ്ഞു. തിരുവനന്തപുരത്ത് മാധ്യമപ്രവര്ത്തകരുടെ ചോദ്യത്തോട് പ്രതികരിക്കുകയായിരുന്നു അദ്ദേഹം.
വകുപ്പ് വിഭജിച്ചതുകൊണ്ട് എന്തെങ്കിലും പ്രായോഗിക ബുദ്ധിമുട്ടുണ്ടാകുമെങ്കില് മാത്രം തീരുമാനം പുനഃപരിശോധിക്കാമെന്നാണ് പി.കെ.കുഞ്ഞാലിക്കുട്ടി പറഞ്ഞതെന്നും ഉമ്മന് ചാണ്ടി പറഞ്ഞു. തദ്ദേശഭരണ വകുപ്പിന്റെ വിഭജനം ആവശ്യമെങ്കില് പുനപരിശോധിക്കാമെന്ന് മന്ത്രി പി.കെ കുഞ്ഞാലിക്കുട്ടി പറഞ്ഞതിനെക്കുറിച്ച് ചോദിച്ചപ്പോഴായിരുന്നു മുഖ്യമന്ത്രിയുടെ പ്രതികരണം.
തദ്ദേശ സ്വയംഭരണ വകുപ്പ് മന്ത്രിയായ എം.കെ.മുനീറിന് പഞ്ചായത്ത് ഭരണം മാത്രമാണ് നല്കിയിട്ടുള്ളത്. മുനീറിനെ ഒതുക്കുന്നതിന്റെ ഭാഗമായാണിതെന്ന് ആക്ഷേപമുണ്ട്. കോര്പ്പറേഷന്, മുനിസിപ്പാലിറ്റി ഭരണം പികെ കുഞ്ഞാലിക്കുട്ടിക്കാണ് നല്കിയിരിക്കുന്നത്.
ഇത് ഭരണപ്രതിസന്ധി സൃഷ്ടിക്കുമെന്ന് വിമര്ശനം ഉയരുന്ന പശ്ചാത്തലത്തിലാണ് മുഖ്യമന്ത്രിയുടെ പ്രതികരണം.