ക്ഷേത്ര സുരക്ഷ: കമാന്‍ഡോകളുടെ എണ്ണം കൂട്ടണം

തിരുവനന്തപുരം: ശ്രീപത്മനാഭസ്വാമി ക്ഷേത്രത്തിലെ അമൂല്യ സമ്പത്തിനെക്കുറിച്ചുള്ള വിവരങ്ങള്‍ പുറത്തുവരുന്ന സാഹചര്യത്തില്‍ ക്ഷേത്രത്തിന്റെ സുരക്ഷ വര്‍ദ്ധിപ്പിക്കണമെന്ന് എ.ഡി.ജി.പി വേണുഗോപാല്‍ നായര്‍ സര്‍ക്കാരിന് റിപ്പോര്‍ട്ട് സമര്‍പ്പിച്ചു.

പഴുതുകളില്ലാതെ സുരക്ഷ ഉറപ്പാക്കണമെന്ന് റിപ്പോര്‍ട്ടില്‍ പറയുന്നു. ആധുനിക സംവിധാനങ്ങളോടെ ത്രിതല സുരക്ഷയാണ് ഒരുക്കേണ്ടത്. ക്ഷേത്രത്തില്‍ സുരക്ഷയ്ക്ക് വിന്യസിച്ചിരിക്കുന്ന കമാന്‍ഡോകളുടെ എണ്ണം വര്‍ദ്ധിപ്പിക്കണം.

സുരക്ഷാ ഭീഷണിയുയര്‍ത്തുന്ന വ്യാപാരസ്ഥാപനങ്ങളെ ക്ഷേത്രത്തിന് സമീപമുള്ള കെട്ടിടത്തില്‍ നിന്ന് ഒഴിപ്പിക്കണം. സുപ്രധാന മേഖലകളില്‍ സെന്‍സറുകളും കാമറകളും സ്‌കാനറുകളും സ്ഥാപിക്കണമെന്നും റിപ്പോര്‍ട്ടില്‍ പറയുന്നു.

ക്ഷേത്രത്തിലെ സ്വത്ത് ശേഖരം സംബന്ധിച്ച് ആഗോളമാധ്യമങ്ങളില്‍ വരെ വാര്‍ത്താപ്രാധാന്യം നേടിയ സാഹചര്യത്തില്‍ ക്ഷേത്ര പരിസരം അതീവ സുരക്ഷാമേഖലയാക്കണമെന്നും റിപ്പോര്‍ട്ടിലുണ്ട്.

English summary

In the report submitted, ADGP Venugopal K Nair has recommended to announce the temple and premises as high security sector following the discovery of treasure at the Sree Padmanabhaswamy Temple in the capital city.