ഐസകിന്റെ ബദല്‍ ധവളപത്രം സഭയില്‍ വയ്ക്കില്ല

തിരുവനന്തപുരം: ധനമന്ത്രി കെ.എം മാണി പുറത്തിറക്കിയ ധവളപത്രത്തിന് എതിരായി മുന്‍ ധനമന്ത്രി തോമസ് ഐസക് തയ്യാറാക്കിയ ബദല്‍ ധവളപത്രം നിയമസഭയുടെ മേശപ്പുറത്തുവയ്ക്കാന്‍ സ്പീക്കര്‍ അനുവദിച്ചില്ല. രേഖകള്‍ സഭയുടെ മേശപ്പുറത്ത് വയ്ക്കണമെങ്കില്‍ ചെയറിന്റെ അനുമതി വേണമെന്ന് സ്പീക്കര്‍ വ്യക്തമാക്കി.

ധനകാര്യ ബില്ലിന്റെ വോട്ട് ഓണ്‍ അക്കൗണ്ടിന്മേലുള്ള ചര്‍ച്ചയ്ക്കു ശേഷം ധനമന്ത്രി മറുപടി പറയുന്ന സമയത്തു ക്രമപ്രശ്‌നവുമായി തോമസ് ഐസക് എഴുന്നേല്‍ക്കുകയായിരുന്നു. ബദല്‍ ധവളപത്രം സഭയുടെ മേശപ്പുറത്ത് വയ്ക്കാന്‍ തോമസ് ഐസക് ശ്രമിച്ചെങ്കിലും സ്പീക്കര്‍ അനുവദിച്ചില്ല. ഇതിനെ തുടര്‍ന്ന് ബദല്‍ ധവളപത്രം മേശപ്പുറത്ത് വയ്ക്കാനുള്ള ശ്രമത്തില്‍ നിന്ന് തോമസ് ഐസക് പിന്മാറി. എന്നാല്‍ ബദല്‍ ധവളപത്രം ജനങ്ങളുടെ മുന്നില്‍ വയ്ക്കുമെന്ന് പിന്നീട് പ്രതിപക്ഷ ഉപനേതാവ് കോടിയേരി ബാലകൃഷ്ണന്‍ പറഞ്ഞു.

ഇതിനെ തുടര്‍ന്ന് ഭരണകക്ഷി അംഗങ്ങള്‍ പ്രസംഗം വലിച്ചു നീട്ടുന്നുവെന്ന് ആരോപിച്ച് പ്രതിപക്ഷം നടുത്തളത്തിലിറങ്ങി. സഭയില്‍ അംഗങ്ങള്‍ ഇല്ലാത്തിനാല്‍ ബജറ്റ് വോട്ടിനിടാതെ ധനമന്ത്രി അടക്കമുള്ളവര്‍ പ്രസംഗം നീട്ടുകയാണെന്ന് ആരോപിച്ചായിരുന്നു ബഹളം. തുടര്‍ന്ന് പ്രതിപക്ഷം സഭയില്‍നിന്ന് ഇറങ്ങിപ്പോയി.

English summary

Speaker denied permission for Thomas Isaac to present his white paper in the assembly.