കോടീശ്വര ദമ്പതിമാരുടെ മധുവിധു ഹസാരെയ്‌ക്കൊപ്പം

ദില്ലി: അഴിമതിയ്‌ക്കെതിരെ സമരം നടത്തുന്ന അണ്ണാ ഹസാരെയ്ക്ക് പിന്തുണ പ്രഖ്യാപിച്ചുകൊണ്ട് ദില്ലിയിലെ രാംലീല മൈതാനത്ത് പലതരക്കാരായ ആളുകള്‍ എത്തുന്നുണ്ട്. പാവപ്പെട്ടവനും പണക്കാരനും, സാധാരണക്കാരനും സിനിമാതാരങ്ങളും എല്ലാം.

ഇക്കൂട്ടത്തില്‍ കഴിഞ്ഞ ദിവസമെത്തിയ വ്യത്യസ്തരായ രണ്ടുപേരുണ്ട്. ലുധിയാന സ്വദേശികളായ പരാഗും ശിവാനിയും. എന്താണ് ഇവരുടെ പ്രത്യേകതയെന്നല്ലേ, ഇവര്‍ മധുവിധു ആഘോഷിക്കാനാണ് രാംലീലയില്‍ എത്തിയിരിക്കുന്നത്. അതേ, രാജ്യത്തിന്റെ നന്മയ്ക്കായി നിലകൊള്ളുന്ന ഹസാരെയ്ക്ക് പിന്തുണ നല്‍കിക്കൊണ്ടാണ് ഇവരുടെ മധുവിധു ആഘോഷം.

പരാംഗും ശിവാനിയും അടുത്തിടെയാണ് വിവാഹിതരായത്, കോടീശ്വരദമ്പതികളാണ് ഇവര്‍. വിവാഹശഷം തങ്ങളുടെ നിലയ്ക്കും വിലയ്ക്കും അനുസരിച്ചുള്ള വമ്പന്‍ ഹണിമൂണ്‍ യാത്രയ്ക്കായുള്ള ഒരുക്കങ്ങളിലായിരുന്ന ഇവര്‍. ഇതിനായി സ്ഥലവും യാത്രാ കാര്യങ്ങളുമെല്ലാം ഇവര്‍ തീരുമാനിച്ചിരുന്നു. എന്നാല്‍ ഇതിനിടെയാണ് ബുധനാഴ്ച ഇവര്‍ ഹസാരെയുടെ പ്രസംഗം ടിവിയില്‍ കേട്ടത്.

ഇതില്‍ ആകൃഷ്ടരായി ഇവര്‍ തങ്ങളുടെ പ്ലാന്‍ മാറ്റി അഴിമതിരഹിത ഇന്ത്യയ്ക്കുവേണ്ടിയുള്ള സമരത്തില്‍ പങ്കെടുക്കാന്‍ പുറപ്പെടുകയായിരുന്നു. നിരാഹാരത്തിന്റെ ഒന്‍പതാംദിവസത്തെ രാത്രിയില്‍ ഹസാരെ നടത്തിയ സംഭാഷണം കേട്ടയുടനെതന്നെ ലുധിയാനയില്‍നിന്നും യാത്രയായ ഇവര്‍ പിന്നേറ്റ്‌രാവിലെ ദില്ലിയിലെ രാംലീലാ മൈതാനത്ത് വന്ന് ഹസാരെയുടെ സമരത്തില്‍ പങ്കുചേര്‍ന്നു.

ജനലോക്പാല്‍ ബില്‍ കൊണ്ടുവരുന്നതിനുവേണ്ടി സമരവുമായി മുന്നോട്ടുപോകുമെന്ന അണ്ണാ ഹസാരെയുടെ വാക്കുകള്‍കേട്ട് ദില്ലിയ്ക്ക് പോകാന്‍ ഭാര്യയും നിര്‍ബന്ധിച്ചു- പരാംഗ് പറയുന്നു. ബില്‍ പാസാക്കുന്നതിനായി പ്രതിഷേധങ്ങളില്‍ അണിചേരാനും ജയില്‍നിറയ്ക്കല്‍ സമരത്തില്‍ പങ്കെടുക്കാനുംവരെ തങ്ങള്‍ ഒരുക്കമാണെന്ന് ശിവായും പറയുന്നു. എന്തൊരു കപ്പിള്‍സ് അല്ലേ? തീര്‍ത്തും വ്യത്യസ്തര്‍!!

English summary

Millionaire couple from Ludhiyana Parag and Shivani Garg skip their honeymoon and joined with Anna Hazare's movement in Ramlila.