മായാവതിയ്ക്ക് ചെരുപ്പ് വാങ്ങാനും പ്രത്യേക വിമാനം

ദില്ലി: ഉത്തര്‍പ്രദേശ് മുഖ്യമന്ത്രി മായാവതി തന്റെ ഇഷ്ട ബ്രാന്‍ഡിലുള്ള ചെരുപ്പ് വാങ്ങാനായി ജറ്റ് വിമാനം മുംബൈയിലേയ്ക്ക് അയച്ചതായി വിക്കിലീക്‌സ് വെളിപ്പെടുത്തല്‍.

എല്ലാവര്‍ഷവും തന്റെ പിറന്നാളിന് പാര്‍ട്ടി അംഗങ്ങളില്‍ നിന്ന് ലക്ഷകണക്കിന് രൂപ സമ്മാനമായി സ്വീകരിക്കാറുണ്ടെന്നും 2008 ഒക്ടോബര്‍ 23ന് വാഷിംങ്ടണിലേയ്ക്കയച്ച കേബിളില്‍ പറയുന്നു.

തന്റെ ഭക്ഷണം രുചിച്ചു നോക്കാന്‍ മായാവതി ജീവനക്കാരെ നിയമിച്ചിരുന്നു. ഇവര്‍ രുചിച്ച് ഭക്ഷ്യവിഷബാധയില്ലെന്ന് ഉറപ്പുവരുത്തിയ ശേഷം മാത്രമേ മായാവതി ആഹാരം കഴിച്ചിരുന്നുള്ളൂ. തന്റെ വീട്ടില്‍ നിന്ന് ഓഫീസിലേയ്ക്ക് പോകാനായി ഒരു പ്രത്യേക പാത തന്നെ മായാവതി നിര്‍മ്മിച്ചിരുന്നു. തന്റെ വാഹനവ്യൂഹം കടന്ന് പോയാലുടന്‍ ഈ റോഡ് വൃത്തിയാക്കണമെന്നും മായാവതി നിര്‍ദേശിച്ചിരുന്നു. ഇതെല്ലാം മായാവതി വിവിധതരം വിഭ്രാന്തികള്‍ക്ക് അടിമയാണെന്നാണ് സൂചിപ്പിയ്ക്കുന്നത്-വിക്കിലീക്‌സ് പറയുന്നു.

മന്ത്രിസഭയിലെ ഒരംഗം കാണിച്ച ചെറിയ തെറ്റിന് അയാളെ തന്റെ മുന്നില്‍ വച്ച് ഏത്തമിടുവിയ്ക്കാനും മായാവതി മുതിര്‍ന്നുവെന്ന് വെളിപ്പെടുത്തലിലുണ്ട്.
എന്നാല്‍ വെളിപ്പെടുത്തലുകളോട് പ്രതികരിയ്ക്കാന്‍ മായാവതി തയ്യാറായിട്ടില്ല.

English summary

Uttar Pradesh chief minister and head of the Bahujan Samaj Party (BSP) Mayawati sent her private jet to pick up a pair of sandals, according to leaked US diplomatic cables. US embassy cables from 2007 to 2009 released by the WikiLeaks website in recent days describe Mayawati, 55, as "a first-rate egomaniac" who "is obsessed with becoming prime minister".