ദില്ലി സ്ഫോടനം ഭീകരാക്രമണമെന്ന് ചിദംബരം

ദില്ലി: ദില്ലി ഹൈക്കോടതിക്കു സമീപമുണ്ടായ സ്‌ഫോടനം തീവ്രവാദി ആക്രമണമെന്ന് ആഭ്യന്തരമന്ത്രി പി.ചിദംബരം സ്ഥിരീകരിച്ചു. പാര്‍ലമെന്റിനെ അഭിസംബോധനചെയ്ത് സംസാരിക്കുകയായിരുന്നു അദ്ദേഹം. സ്‌ഫോടനത്തെക്കുറിച്ച് എന്‍ഐഎ അന്വേഷിക്കുമെന്നും അദ്ദേഹം പറഞ്ഞു. രാവിലെ പത്തേ കാലോടെയുണ്ടായ സ്‌ഫോടനത്തില്‍ ഇതുവരെ പത്ത് പേര്‍ മരിച്ചിട്ടുണ്ട്. പലരുടെയും പരിക്കുകള്‍ ഗുരുതരമായതിനാല്‍ മരണസംഖ്യ ഉയരാനിടയുമുണ്ട്. സ്‌ഫോടനത്തില്‍ പരിക്കേറ്റ് 65 പേരാണ് ആശുപത്രികളില്‍ ചികിത്സയില്‍ കഴിയുന്നത്.

ജൂലൈയില്‍ ആക്രമണം നടന്നപ്പോള്‍ തന്നെ തീവ്രവാദ സംഘടനകളെക്കുറിച്ച് വിവരം ലഭിച്ചിരുന്നു. ഇതേക്കുറിച്ചുള്ള വിവരം ഇപ്പോള്‍ പുറത്തു വിടാനാവില്ല. ദില്ലി തീവ്രവാദികളുടെ ലക്ഷ്യസ്ഥാനമാണന്ന് ചിദംബരം പറഞ്ഞു.

രാജ്യത്തെ അസ്ഥിരപ്പെടുത്താനുള്ള ശ്രമങ്ങളാണ് തീവ്രവാദികള്‍ നടത്തുന്നതെന്ന് അദ്ദേഹം അറിയിച്ചു. സ്‌ഫോടനത്തിനു പിന്നില്‍ ആരാണെന്ന് കൂടുതല്‍ അന്വേഷണത്തിനുശേഷമേ പറയാനാവുകയുള്ളൂവെന്ന് ചിദംബരം പറഞ്ഞു.

രാജ്യം ഒറ്റക്കെട്ടായി നില്‍ക്കേണ്ട സമയമാണെന്ന് മുതിര്‍ന്ന ബിജെപി നേതാവ് എല്‍.കെ. അദ്വാനി പറഞ്ഞു. സ്‌ഫോടനത്തെ വിവിധ കക്ഷിനേതാക്കള്‍ അപലപിച്ചു.