അമ്മായിഅമ്മയും ഭാര്യയും തല്ലി; 40കാരന് നാടുവിട്ടു
ചെന്നൈ: ചാനലിലെ റിയാലിറ്റിഷോയില് രണ്ടാംഭാര്യയും അവരുടെ അമ്മയും കുറ്റപ്പെടുത്തിയതിന് പിന്നാലെ നാല്പതുകാരനെ കാണാതായി.
സ്റ്റുഡിയോ നടത്തുന്ന പ്രിന്സ് എന്നയാളാണ് റിയാലിറ്റിഷോയില് ഭാര്യയും അമ്മായിഅമ്മയും അപമാനിച്ചതിനെത്തുടര്ന്ന് നാടുവിട്ടത്. സംഭവത്തിന് പിന്നാലെ പ്രിന്സിന്റെ സഹോദരി മിനി മൗലി വില്ലിവാക്കം പൊലീസില് പരാതി നല്കി.
ഓഗസ്റ്റ് മുപ്പത് മുതല് പ്രിന്സിനെ കാണാനില്ലെന്നാണ് പരാതിയില് പറയുന്നത്. ഓഗസ്റ്റ് മുപ്പതിനായിരുന്നുവത്രേ പ്രശ്നത്തിനാധാരമായ സൊല്ലുവതെല്ലാം ഉണ്മൈ(പറയുന്നതെല്ലാം സത്യം) എന്ന പരിപാടിയുടെ ഷൂട്ടിങ് നടന്നത്.
ഷോയില് പ്രിന്സും പങ്കെടുത്തിരുന്നു. പരിപാടിക്കിടെ ഭാര്യയും അമ്മായിഅമ്മയും ഇദ്ദേത്തെ കടന്നാക്രമിക്കുകയായിരുന്നുവത്രേ. അപമാനഭാരത്താല് മനംനൊന്താണ് പ്രിന്സ് നാടുവിട്ടതെന്നാണ് സൂചന. പൊലീസിന് ഇതേവരെ ഇദ്ദേഹത്തെ കണ്ടെത്താന് കഴിഞ്ഞിട്ടില്ല.
സീടിവിയുടെ തമിഴ് ചാനലിലാണ് ഈ ഷോ നടക്കുന്നത്. നിര്മല പെരിയസ്വാമിയാണ് ഇതിന്റെ അവതാരക. സ്വ്ന്തം ജീവിതകഥ പറയനായി പ്രിന്സിനും ഭാര്യ മിനിയ്ക്കും ക്ഷണം ലഭിക്കുകയായിരുന്നു. മിനിയുടെ മാതാവ് പ്രേക്ഷകര്ക്കൊപ്പം ഗാലറിയിലായിരുന്നു.
ഭാര്യയും ഭര്ത്താവും തമ്മിലുള്ള വാഗ്വാദം മുറുകിയപ്പോള് അമ്മ ഗാലറിയില് നിന്നും സ്റ്റേജിലേയ്ക്കുവന്ന പ്രിന്സിനെ മര്ദ്ദിക്കുകയായിരുന്നു. ഇവര്ക്കൊപ്പം ഭാര്യയും കൂടി. ഈ സമയത്തും ക്യാമറ പ്രവര്ത്തിക്കുന്നുണ്ടായിരുന്നു.
ഈ സംഭവങ്ങളെല്ലാം പരിപാടിയുടെ തിരക്കഥയുടെ ഭാഗമാണെന്ന് കരുതിയ ക്യാമറാ മാനും സംഘവം ഒരു രംഗംപോലും വിടാതെ ചിത്രീകരിച്ചു. പിന്നീട് അവതാരക ഓടി പ്രിന്സിന്റെ രക്ഷക്കെത്തുന്നത് കണ്ടപ്പോഴാണ് ക്യാമറ സംഘത്തിന് പ്രശ്നം മനസ്സിലായത്. അതുവരെ ചിത്രീകരണം തുടരുകയായിരുന്നു.
പിന്നീട് കാഴ്ചക്കാരും ചാനല് പ്രവര്ത്തകരുമെല്ലാം ചേര്ന്നാണ് ഭാര്യയെയും അമ്മായിഅമ്മയെയും ആക്രമണത്തില് നിന്നും പിന്തിരിപ്പിച്ചത്. പിന്നീട് പ്രിന്സ് സ്റ്റുഡിയോയില് നിന്നും പുറത്തുപോവുകയും ചെയ്തു.
പ്രിന്സ് ഫോണില് വിളിച്ച് സഹോദരിയോട് കാര്യം പറഞ്ഞു. പിന്നീട് ഇയാളെ കാണാതാവുകയായിരുന്നു. ആദ്യവിവാഹബന്ധം വേര്പെടുത്തിയതില്പ്പിന്നെയാണ് ഇയാള് മിനിയെ വിവാഹം ചെയ്തത്. കുറച്ചുനാളായി രണ്ടുപേരും പിരിഞ്ഞാണത്രേ താമസിക്കുന്നത്.
ഷൂട്ടിങ്ങിനിടെയുണ്ടാകുന്ന ഇത്തരം പ്രശ്നങ്ങള്ക്ക് തങ്ങള് ഉത്തരവാദികളല്ലെന്നാണ് ചാനലുകാര് പറയുന്നത്. ഇത്തരം സംഭവങ്ങള് സംപ്രേഷണം ചെയ്യാറില്ലെന്നും അവര് പറയുന്നു.