കത്ത് ജുഡീഷ്യറിയെ ഭയപ്പെടുത്താന്‍: പിണറായി

തിരുവനന്തപുരം: പാമൊലിന്‍ കേസില്‍ ജുഡീഷ്യറിയെ ഭയപ്പെടുത്തി വരുതിയില്‍ കൊണ്ടുവരാനുള്ള അപകടകരമായ നീക്കമാണു ഭരണപക്ഷ ചീഫ് വിപ്പ് പിസി ജോര്‍ജ്ജിന്റെ ഭാഗത്തുനിന്നുണ്ടായതെന്ന് സിപിഎം സംസ്ഥാന സെക്രട്ടറി പിണറായി വിജയന്‍.

ഇതിന്റെ ഭാഗമാണ് വിജിലന്‍സ് ജഡ്ജിയ്‌ക്കെതിരെ രാഷ്ട്രപതിയ്ക്ക് അയച്ചിരിക്കുന്ന കത്ത്. പാമൊലിന്‍ കേസ് പരിഗണിക്കുന്ന ന്യായാധിപനെതിരെ ആക്ഷേപം ഉന്നയിച്ചു രാഷ്ട്രപതി, ഗവര്‍ണര്‍, ചീഫ് ജസ്റ്റിസ്, ജില്ലാ ജഡ്ജി തുടങ്ങിയവര്‍ക്കെല്ലാം ചീഫ് വിപ്പ് കത്തയച്ചതു മുഖ്യമന്ത്രി ഉള്‍പ്പെടെ ഭരണകക്ഷി നേതാക്കളുടെ അറിവോടെയാണ്- പിണറായി ആരോപിച്ചു.

താന്‍ ഇതേപ്പറ്റി അറിഞ്ഞിട്ടില്ലെന്ന ഉമ്മന്‍ ചാണ്ടിയുടെ ഇപ്പോഴത്തെ കൈകഴുകല്‍ ജനങ്ങളുടെ കണ്ണില്‍ പൊടിയിടാനുള്ള അടവാണ്.

കോടതി ഉത്തരവില്‍ വിയോജിപ്പുണ്ടെങ്കില്‍ ഉയര്‍ന്ന നീതിപീഠങ്ങളെ സമീപിക്കുന്നതിനു പകരം ജഡ്ജിയെ വ്യക്തിപരമായി അധിക്ഷേപിക്കുന്നതു ജുഡീഷ്യറിയുടെ അന്തസിനെയും മൂല്യങ്ങളെയും ഇടിച്ചുതാഴ്ത്തുന്നതാണ്- പിണറായി പറഞ്ഞു.

English summary

CPM state secretary Pinarayi Vijayan hits out Chief Wip PC George over his letter to President against Vigilance court judge,