ചിദംബരത്തിനെതിരായ കുറിപ്പ്; പ്രണബിന് മൗനം

ന്യൂയോര്‍ക്ക്: 2ജി ഇടപാടിലെ ക്രമക്കേടിനെക്കുറിച്ച് അന്ന് ധനമന്ത്രിയായിരുന്ന പി ചിദംബരത്തിന് അറിയാമായിരുന്നുവെന്ന് സൂചിപ്പിച്ച് പ്രധാനമന്ത്രിയ്ക്ക് കത്തയച്ചുവെന്ന വാര്‍ത്തയോട് പ്രതികരിക്കാനില്ലെന്ന് കേന്ദ്രമന്ത്രി പ്രണബ് മുഖര്‍ജി.

വിഷയം സുപ്രീം കോടതിയുടെ പരിഗണനയിലായതിനാല്‍ പ്രതികരിക്കാന്‍ കഴിയില്ലെന്നാണ് പ്രണബ് വ്യക്തമാക്കിയിരിക്കുന്നത്. അഴിമതി ഇല്ലാതാക്കാനാണ് സര്‍ക്കാര്‍ വിവരാവകാശ നിയമം നടപ്പിലാക്കിയതെന്നും അതിന്റെ ഫലമായിട്ടാണ് കത്ത് പുറത്തുവന്നിട്ടുള്ളതെന്നും പ്രണബ് പറഞ്ഞു.

2 ജി. സ്‌പെക്ട്രം ലേലം ചെയ്യേണ്ടെന്ന് തീരുമാനിച്ചത് അന്ന് ധനമന്ത്രിയായിരുന്ന പി. ചിദംബരത്തിന്റെ അറിവോടെയാണെന്ന് വ്യക്തമാക്കുന്ന രേഖകള്‍ ബുധനാഴ്ച പുറത്തുവന്നിരുന്നു. 2001ലെ നിരക്കില്‍ത്തന്നെ സ്‌പെക്ട്രം നല്‍കണമെന്ന ടെലികോം മന്ത്രി എ. രാജയുടെ ആവശ്യത്തെ അന്ന് ധനമന്ത്രിയായിരുന്ന ചിദംബരം അംഗീകരിച്ചിരുന്നെവെന്നാണ് കുറിപ്പില്‍ നിന്നും വ്യക്തമാകുന്നത്.

ലേലം ഒഴിവാക്കുന്നതില്‍ ചിദംബരത്തിന്റെ പങ്ക് അന്വേഷിക്കണമെന്ന കേസ് പരിഗണിക്കവെ ഹര്‍ജിക്കാരനായ ജനതാപാര്‍ട്ടി അധ്യക്ഷന്‍ സുബ്രഹ്മണ്യം സ്വാമിയാണ് മറ്റ് രേഖകള്‍ക്കൊപ്പം നിര്‍ണായകമായ കുറിപ്പും സുപ്രീം കോടതിയില്‍ സമര്‍പ്പിച്ചത്.

English summary

Finance Minister Pranab Mukherjee today refused to comment on a letter sent by his ministry to Prime Minister Manmohan Singh on the 2G spectrum scam, saying he cannot make any remark on the matter is it is "subjudice".