സലിമിന്റെ കനിവില്‍ അലവിക്കുട്ടിയ്ക്ക് ഹജ്ജ് പുണ്യം

മലപ്പുറം: നടന്‍ സലിം കുമാറിന്റെ കനിവില്‍ കൊണ്ടോട്ടി സ്വദേശിയായ 71കാരന്‍ ഹജ്ജ് ചെയ്യാന്‍ പോകുന്നു. സലിം കുമാറാണ് അലവിക്കുട്ടിയുടെ ഹജ്ജ് ചെലവുകള്‍ എല്ലാം വഹിക്കുന്നത്. അഞ്ചുവര്‍ഷത്തോളമായി ഹജ്ജിന് പോകണമെന്ന ആഗ്രഹവുമായി നടക്കുകയാണ് അലവിക്കുട്ടി. അഞ്ച് പെണ്‍മക്കളുള്ള അദ്ദേഹം അവരെയെല്ലാം വിവാഹം കഴിപ്പിച്ചയച്ചിട്ടുണ്ട്.

ബാധ്യതകളൊക്കെ കഴിഞ്ഞപ്പോളാണ് ഹജ്ജിന് പോകാനായി അലവിക്കുട്ടി പണം മിച്ചംപിടിക്കാന്‍ തുടങ്ങിയത്. കൂലിപ്പണി ചെയ്തും യതീംഖാനയിലെ റിസീവര്‍ ജോലിയില്‍ നിന്നുമൊക്കെയാണ് അലവിക്കുട്ടി ജീവിക്കുന്നത്.

സംസ്ഥാന ഹജ്ജ്കമ്മിറ്റി മുഖേന നറുക്കെടുപ്പില്ലാതെ അലവിക്കുട്ടിയ്ക്ക് ഹജ്ജിന് അവസരം ലഭിച്ചും. കയ്യില്‍ കരുതിയിരുന്ന 31,000 രൂപ ഇതിനായി അടയ്ക്കുകയും ചെയ്തു. ഈ സമയത്താണ് അലവിക്കുട്ടിക്ക് സഹായവുമായി സലിം കുമാര്‍ എത്തുന്നത്.

ഹജ്ജിന് പോകാനായി ജീവിതത്തിലുടനീളം കഷ്ടപ്പെടുന്ന കഥാപാത്രത്തെ അവതകിപ്പിച്ച സലിമിന്റെ വലിയ ആഗ്രഹമായിരുന്നു സ്വന്തം ചെലവില്‍ ഒരാളെ ഹജ്ജിനയയ്ക്കുകയെന്നത്. സലിംകുമാര്‍ 200 പേരെ നറുക്കിട്ടെടുത്താണ് അലവിക്കുട്ടിയെ തിരഞ്ഞെടുത്തത്. ഒക്ടോബര്‍ നാലിനാണ് ഇദ്ദേഹം ഹജ്ജിന് പുറപ്പെടുന്നത്.

English summary

When he won the national best actor award for his role in ‘Adaminte Makan Abu’, Salim Kumar had announced that he would give financial aid for one person from Kerala to perform the holy Hajj pilgrimage. And that decision is going to help Koppilakkal Alavikkutty of Malappuram to fulfill his dream of performing the pilgrimage