വാളകം: കാറിന്റെ കാര്യം ദുരൂഹമായി തുടരുന്നു

തിരുവനന്തപുരം: വാളകത്ത് ആക്രമണത്തിനിരയായ അധ്യാപകന്‍ സ്വന്തം കാറിലാണ് സഞ്ചരിച്ചതെന്ന വാദം തെറ്റാണെന്ന് റിപ്പോര്‍ട്ട്. അധ്യാപകന്‍ താന്‍ സ്വന്തം കാറില്‍ സഞ്ചരിച്ചപ്പോഴായിരുന്നു ആക്രമണം എന്നാണ് മജിസ്‌ട്രേറ്റിന് നല്‍കിയ മൊഴിയില്‍ പറഞ്ഞിരുന്നത്. എന്നാല്‍ ആക്രമണം നടന്ന ഉടന്‍ അധ്യാപകന്റെ വീട്ടിലെത്തിയ ഏഷ്യാനെറ്റ് ചാനല്‍ സംഘത്തിന് അധ്യാപകന്റെ കാര്‍ വീട്ടുമുറ്റത്ത് കിടക്കുന്നത് കാണാനായി. ഇത് അധ്യാപകന്‍ വീണ്ടും തെറ്റായ മൊഴി നല്‍കി അന്വേഷണത്തെ വഴിതെറ്റിക്കാന്‍ ശ്രമിയ്ക്കുന്നുവെന്ന സൂചനയാണ് നല്‍കുന്നത്.

എന്നാല്‍ ഡ്യൂട്ടി ഡോക്ടറോട് അധ്യാപകന്‍ പറഞ്ഞത് താന്‍ കാറില്‍ നിന്ന് വീണതാണെന്നാണ് അധ്യാപകന്‍ പറഞ്ഞത്. ഇക്കാര്യം ഡ്യൂട്ടി ഡോക്ടര്‍ സര്‍ട്ടിഫിക്കറ്റില്‍ രേഖപ്പെടുത്തിയിട്ടുമുണ്ട്. അധ്യാപകന്‍ കാറില്‍ സഞ്ചരിക്കുമ്പോഴായിരുന്നു ആക്രമണം എന്ന മൊഴി പോലീസ് പൂര്‍ണ്ണമായും വിശ്വസിച്ചിട്ടില്ല. അധ്യാപകനെ അക്രമി സംഘം കാറു കൊണ്ട് ഇടിച്ചു വീഴ്ത്തിയ ശേഷം ആക്രമിയ്ക്കാനുള്ള സാധ്യതയും പോലീസ് അന്വേഷിക്കുന്നുണ്ട്.

അധ്യാപകന്‍ പരസ്പര വിരുദ്ധമായ മൊഴികള്‍ നല്‍കുന്നത് അന്വേഷണത്തെ മോശമായി ബാധിച്ചിട്ടുണ്ട്. അതേസമയം അധ്യാപകന് ബോധം വന്നിട്ടില്ലെന്ന് ഭാര്യ പറഞ്ഞു. അതിനാലാവാം മൊഴികളില്‍ വൈരുദ്ധ്യം വരുന്നതെന്നാണ് ഇവര്‍ അഭിപ്രായപ്പെട്ടത്. എന്നാല്‍ അധ്യാപകന്റെ ബോധത്തിന് ഒരു കുഴപ്പവുമില്ലെന്നാണ് ഡോക്ടര്‍മാര്‍ പറയുന്നത്.

English summary

Teacher Krishnakumar's statement about car creates confusion.,