രാജേഷ് കയ്യേറ്റം ചെയ്തെന്ന് ഉദ്യോഗസ്ഥയുടെ പരാതി

By Nisha Bose

Published: Saturday, October 15, 2011, 17:18 [IST]

തിരുവനന്തപുരം: ടിവി രാജേഷ് എംഎല്‍എ തന്നെ കയ്യേറ്റം ചെയ്‌തെന്നാരോപിച്ച് വനിത വാച്ച്് ആന്‍ഡ് വാര്‍ഡ്‌ വിഎസ് രജനികുമാരി പരാതി നല്‍കി. എന്നാല്‍ കയ്യേറ്റം ചെയ്തത് മനപൂര്‍വ്വമായിരുന്നില്ലെന്നും ബഹളത്തിനിടയില്‍ പിടിച്ചു തള്ളുകയായിരുന്നുവെന്നുമാണ് വനിതാ സെല്ലിലെ പൊലീസുകാര്‍ക്കു നല്‍കിയ മൊഴിയില്‍ രജനി പറഞ്ഞിരിക്കുന്നത്. രാജേഷിനെതിരെ സ്പീക്കര്‍ക്കും പരാതി നല്‍കിയിട്ടുണ്ടെന്ന് രജനി അറിയിച്ചു.

വെള്ളിയാഴ്ചയാണ് നിയമസഭയില്‍ നാടകീയ രംഗങ്ങള്‍ അരങ്ങേറിയത്. കോഴിക്കോട് വെടിവയ്പ്പുമായി ബന്ധപ്പെട്ട അന്വേഷണ റിപ്പോര്‍ട്ട് സഭയില്‍ വയ്ക്കാത്തതിനെതിരെ പ്രതിഷേധിയ്ക്കാനായി ടിവി രാജേഷിന്റെ നേതൃത്വത്തില്‍ ഒരു സംഘം നേതാക്കള്‍ സ്പീക്കര്‍ക്കെതിരെ കുതിച്ചു.

ഇതിനിടയില്‍ ഇവരെ തടയാനായി എത്തിയ വനിതാ വാച്ച് ആന്‍ഡ് വാര്‍ഡിന് പരിക്കേറ്റു. തന്നെ ടിവി രാജേഷ് എംഎല്‍എ പിടിച്ചു തള്ളിയെന്ന് വാച്ച് ആന്‍ഡ് വാര്‍ഡ് വിഎസ് രജനികുമാരി പറഞ്ഞു. എന്നാല്‍ രജനികുമാരി തങ്ങളെയാണ് ആക്രമിച്ചതെന്ന് പ്രതിപക്ഷ നേതാക്കള്‍ പറഞ്ഞു.

തുടര്‍ന്ന് സഭയുടെ ദൃശ്യങ്ങള്‍ പരിശോധിച്ചു. മാധ്യമപ്രവര്‍ത്തകരുടെ സാന്നിധ്യത്തില്‍ ദൃശ്യങ്ങള്‍ പരിശോധിക്കണമെന്ന് ഭരണപക്ഷം ആവശ്യപ്പെട്ടെങ്കിലും പ്രതിപക്ഷം ഇതിന് സമ്മതിച്ചിരുന്നില്ല. ദൃശ്യങ്ങള്‍ പരിശോധിച്ച ശേഷവും ഇരവരും തങ്ങളുടെ ആരോപണങ്ങളില്‍ ഉറച്ചു നിന്നു.

Published On October 15, 2011