കുഞ്ഞാലിക്കുട്ടിയുടെ ഐപാഡ് വിഎസിന് വേണ്ട

തിരുവനന്തപുരം: കേരള നിയമസഭയിലെ എംഎല്‍എമാര്‍ക്കെല്ലാം ആപ്പിളിന്റെ ഐപാഡ്. 25 ദിവസത്തെ പോര്‍വിളിയ്ക്കും കയ്യാങ്കളിയ്ക്കുമൊക്കെ സാക്ഷ്യംവഹിച്ച നിയമസഭ സമ്മേളനത്തിന്റെ അവസാനദിനത്തിലാണ് എംഎല്‍എമാര്‍ക്കെല്ലാം ഐപാഡ് നല്‍കുന്ന കാര്യം സ്പീക്കര്‍ അറിയിച്ചത്.

കുഞ്ഞാലിക്കുട്ടി ഭരിയ്ക്കുന്ന ഐടി വകുപ്പാണ് ജനപ്രതിനിധികള്‍ക്കെല്ലാം നാല്‍പതിനായിരം രൂപ വിലവരുന്ന ഐപാഡ് സമ്മാനമായി നല്‍കിയത്. യുഡിഎഫ് എംഎല്‍എമാര്‍ക്ക് പുറമെ കുഞ്ഞാലിക്കുട്ടിയെ സര്‍വശക്തിയുമെടുത്ത് എതിര്‍ക്കുന്ന പ്രതിപക്ഷ എംഎല്‍എമാരില്‍ ഒരാളൊഴിച്ച് എല്ലാവരും ഐപാഡ് ഉടന്‍ തന്നെ കൈപ്പറ്റുകയും ചെയ്തു.

വേറാരുമല്ല, കുഞ്ഞാലിക്കുട്ടിയുടെ രാഷ്ട്രീയ എതിരാളിയും പ്രതിപക്ഷ നേതാവുമായ വിഎസാണ് ഐപാഡ് വേണ്ടെന്ന് അറിയിച്ചത്. സ്പീക്കറിന്റെ ഉപഹാരമാണെന്നറിയിച്ച് ഐപാഡുകളിലൊന്ന് വിഎസിന്റെ ഓഫീസിലും എത്തിയിരുന്നു. എന്നാല്‍ ഓഫീസ് ജീവനക്കാര്‍ പെട്ടിതുറന്നപ്പോള്‍ കളിമാറി. 'ബെസ്റ്റ് കോംപ്ലിമെന്റ്‌സ് ഫ്രം കുഞ്ഞാലിക്കുട്ടി'യെന്ന് അതിനുള്ളില്‍ എഴുതിക്കണ്ടതോടെ പെട്ടി അതേപോലെ തിരിച്ചുകൊടുക്കാന്‍ പ്രതിപക്ഷ നേതാവ് നിര്‍ദ്ദേശിച്ചുവെന്നാണ് റിപ്പോര്‍ട്ടുകള്‍.

English summary

Opposition leader VS Achuthanandan reject UDF government Ipad gift.