റൗഫിന്റെ പരാതി: കുഞ്ഞാലിക്കുട്ടിയെ ചോദ്യം ചെയ്യും

കോഴിക്കോട്: കെ.എ റൗഫിന്റെ ആരോപണത്തിന്റെ അടിസ്ഥാനത്തില്‍ വ്യവസായ മന്ത്രി പി.കെ കുഞ്ഞാലിക്കുട്ടിയെ അന്വേഷണ സംഘം ചോദ്യം ചെയ്യും. അന്വേഷണ സംഘത്തിനു മുന്നില്‍ ചോദ്യം ചെയ്യലിനായി ഹാജരാകാമെന്ന് കുഞ്ഞാലിക്കുട്ടി അറിയിച്ചിട്ടുണ്ടെന്നാണ് റിപ്പോര്‍ട്ട്.

പരാതിയിന്‍മേല്‍ അന്വേഷണം നടത്തണമെങ്കില്‍ കുഞ്ഞാലിക്കുട്ടിയുടെ മൊഴിയെടുക്കണമെന്ന് അന്വേഷണ സംഘം ഡിജിപിയെ അറിയിക്കുകയായിരുന്നു. ഇതേ തുടര്‍ന്നാണ് കുഞ്ഞാലിക്കുട്ടിയെ ചോദ്യം ചെയ്യാന്‍ തീരുമാനിച്ചത്.

ബുധനാഴ്ച തിരുവനന്തപുരത്ത് വെച്ച് കുഞ്ഞാലിക്കുട്ടിയെ ചോദ്യംചെയ്യുമെന്നാണ് റിപ്പോര്‍ട്ട്. കണ്ണൂര്‍ റെയ്ഞ്ച് ഐജി കൂടിയായ എസ്. ശ്രീജിത്തിന്റെ നേതൃത്വത്തിലുള്ള അന്വേഷണ സംഘമാണ് ചോദ്യം ചെയ്യുക.

തന്നെ കള്ളക്കേസില്‍ കുടുക്കി കുഞ്ഞാലിക്കുട്ടി ഐസ്‌ക്രീംകേസ് അട്ടിമറിക്കാന്‍ ശ്രമിക്കുന്നുവെന്ന് ചൂണ്ടിക്കാട്ടി റൗഫ് നല്‍കിയ പരാതിയുടെ അടിസ്ഥാനത്തിലാണ് കുഞ്ഞാലിക്കുട്ടിയെ ചോദ്യം ചെയ്യുന്നത്.

ഐസ്‌ക്രീം കേസില്‍ താന്‍ പുതിയ വെളിപ്പെടുത്തലുകള്‍ നടത്തിയതില്‍ പ്രതിഷേധിച്ച് കുഞ്ഞാലിക്കുട്ടി തന്നെ പീഡിപ്പിക്കുന്നുവെന്നും. മഹാരാഷ്ട്രയിലെ ഭൂമി കൈയ്യേറ്റം, റബ്ബര്‍ ഫാക്ടറി കത്തിച്ച കേസ് തുടങ്ങിയവ കുത്തിപ്പൊക്കി തന്നെ കള്ളക്കേസില്‍ കുടുക്കാന്‍ കുഞ്ഞാലിക്കുട്ടി ശ്രമിക്കുന്നുവെന്നുമാണ് റൗഫിന്റെ പരാതിയില്‍ പറയുന്നത്.

English summary

Police team to quiz minister PK Kunjalikutty over the petition filed by KA Rauf in connection with Ice Cream Parlour case,