മുല്ലപ്പെരിയാര്‍: ജലനിരപ്പ് വീണ്ടുമുയര്‍ന്നു

തൊടുപുഴ: മുല്ലപ്പെരിയാര്‍ അണക്കെട്ടിലെ ജലനിരപ്പ് 136 അടിയായി ഉയര്‍ന്നു. അനുവദിനീയമായ ജലനിരപ്പ് 136 അടിയാണ്. ജലനിരപ്പ് ഉയര്‍ന്നതിനേ തുടര്‍ന്ന് സ്പില്‍വേയുടെ 1,2 ഷട്ടറിലൂടെ നീരൊഴുക്ക് തുടങ്ങി. കളക്ടറേറ്റിലും നെടുങ്കണ്ടത്തും കണ്‍ട്രോള്‍ തുറന്നിട്ടുണ്ട്. അണക്കെട്ടിലെ ജലനിരപ്പ് മണിക്കൂറുകള്‍ക്കു മുമ്പ് 135 അടിയില്‍ എത്തിയതേത്തുടര്‍ന്ന് ജില്ലാ ഭരണകൂടം ജാഗ്രതാ നിര്‍ദ്ദേശം പുറപ്പെടുവിച്ചിരുന്നു.

മുല്ലപ്പെരിയാറിന്റെ വൃഷ്ടിപ്രദേശത്ത് പെയ്യുന്ന കനത്ത മഴയേത്തുടര്‍ന്നാണ് ജലനിരപ്പ് ഉയര്‍ന്നത്. മുല്ലപ്പെരിയാര്‍ വിഷയത്തില്‍ പ്രതിഷേധിച്ച് ഇടുക്കി ജില്ലയിലെ അയ്യപ്പന്‍കോവില്‍, ഉപ്പുതറ, കാഞ്ചിയാര്‍ എന്നീ ഗ്രാമപഞ്ചായത്തുകളില്‍ ഹര്‍ത്താല്‍ ആചരിച്ചു. അണക്കെട്ടിലെ ജലനിരപ്പ് ഉയര്‍ന്നതോടെ ജനങ്ങളുടെ ആശങ്കയും കൂടിയിട്ടുണ്ട്. അതേസമയം അണക്കെട്ടിന്റെ അവസ്ഥയെ കുറിച്ച് പഠിക്കാനായി ഭൗമശാസ്ത്രജ്ഞരുടെ സംഘം ഇടുക്കിയിലെത്തിയിട്ടുണ്ട്.

മുല്ലപ്പെരിയാര്‍ പ്രശ്‌നത്തില്‍ കേരളത്തിനുള്ള ആശങ്ക കേന്ദ്ര സര്‍ക്കാറിനെ അറിയിക്കാന്‍ ജലവിഭവ മന്ത്രി പിജെ ജോസഫും റവന്യൂമന്ത്രി തിരുവഞ്ചൂര്‍ രാധാകൃഷ്ണനും തിങ്കളാഴ്ച ദില്ലിയ്ക്ക് പോവും. പ്രശ്‌നത്തില്‍ കേന്ദ്രസര്‍ക്കാര്‍ അടിയന്തരമായി ഇടപെടണമെന്ന് ഇവര്‍ ആവശ്യപ്പെടും.

English summary

Owing to the north-east rains in the catchment areas of Mullaperiyar dam, . The water level in the Mullaperiyar dam on sunday was 135.6 against its total capacity of 136 ft.,