മതംമാറ്റല്‍ : ക്രിസ്ത്യന്‍ പള്ളി ആക്രമിച്ചു

ബാംഗ്ലൂര്‍: നഗരത്തില്‍ ക്രിസ്ത്യന്‍ പള്ളിയ്ക്ക് നേരേ ആക്രമണം, പില്ലാന ഗാര്‍ഡനിലെ അഗപ്പെ പള്ളിയ്ക്കുനേരേയാണ് ആക്രമണമുണ്ടായത്. പള്ളിയിലുണ്ടായിരുന്ന വിശ്വാസികളെ അക്രമികള്‍ ഭീഷണിപ്പെടുടത്തുകയും പാസ്റ്ററെ കയ്യേറ്റം ചെയ്യാന്‍ ശ്രമിക്കുകയും ചെയ്തു.

വിവരമറിഞ്ഞു സ്ഥലത്തെത്തിയ പോലീസ് അക്രമികളെ വിരട്ടിയോടിക്കുകയായിരുന്നു. ഡിസംബര്‍ 18ന് ഞായറാഴ്ച രാവിലെ പതിനൊന്നോടെയാണ് അമ്പതോളം വരുന്ന ഹിന്ദു ജാഗരണ്‍ വേദികെ പ്രവര്‍ത്തകര്‍ ദേവാലയത്തിലെത്തി ആക്രമണം നടത്തിയത്.

ആരാധന കഴിഞ്ഞു വിശ്വാസികള്‍ മടങ്ങാന്‍ ഒരുങ്ങുമ്പോഴാണ് പ്രതിഷേധവുമായി ഹിന്ദു ജാഗരണ്‍ വേദികെ പ്രവര്‍ത്തകര്‍ എത്തിയത്. മതംമാറ്റാന്‍ ശ്രമിക്കുന്നവരെ വിടില്ലായെന്ന് ആക്രമണത്തിനിടെ ഇവര്‍ ഒച്ചവെയ്ക്കുന്നുണ്ടായിരുന്നുവത്രേ.

വിശ്വാസികളെ ഭീഷണിപ്പെടുത്തി ഓടിച്ചതിനു ശേഷം പാസ്റ്റര്‍ റൂബനു നേരെ ഭീഷണിയുമായി എത്തി. വിവരം അറിഞ്ഞു കെ.ജി. ഹള്ളി പോലീസ് സ്ഥലത്തെത്തി. അക്രമികളെ വിരട്ടിയോടിച്ചു.

എന്നാല്‍ ആക്രമണമൊന്നുമുണ്ടായിട്ടില്ലെന്നും ചെറിയ തര്‍ക്കം മാത്രമാണുണ്ടായതെന്നുമാണ് പൊലീസ് പറയുന്നത്. എങ്കിലും 12 പേരെ സംഭവവുമായി ബന്ധപ്പെട്ടു ചോദ്യം ചെയ്തിട്ടുണ്ട്. നിര്‍ബന്ധിത മതപരിവര്‍ത്തനം നടക്കുന്നതു ശ്രദ്ധയില്‍പ്പെട്ടാല്‍ നടപടി സ്വീകരിക്കുമെന്നും പൊലീസ് പറഞ്ഞു.

അഗപ്പെ ചര്‍ച്ചില്‍ നിര്‍ബന്ധിത മതപരിവര്‍ത്തനം നടത്തുന്നതായി ഹിന്ദു ജാഗരണ്‍ വേദി കണ്‍വീനര്‍ പൊന്നപ്പ ആരോപിച്ചിട്ടുണ്ട്. ഒരു മാസത്തിനിടയില്‍ ഇവിടെ ഇരൂനൂറിലേരെ പേരെ മതപരിവര്‍ത്തനം നടത്തിയെന്നും ഞായറാഴ്ച മതപരിവര്‍ത്തനം നടക്കുന്നത് ശ്രദ്ധയില്‍പ്പെട്ടതിനെ തുടര്‍ന്നാണ് പ്രവര്‍ത്തര്‍ പ്രതിഷേധവുമായി എത്തിയതെന്നും അദ്ദേഹം പറഞ്ഞു.

English summary

Hindu right wing groups were at it again on Sunday, when a church in Lingarajpuram was attacked for indulging in alleged religious conversion,