മദ്യപന്‍ ഓക്‌സിജന്‍ മാസ്‌ക് മാറ്റി; കുഞ്ഞ് മരിച്ചു

കൊല്‍ക്കത്ത: മദ്യപിച്ച് ബോധംനഷ്ടപ്പെട്ട ജീവനക്കാരന്‍ ഓക്‌സിജന്‍ മാസ്‌ക് എടുത്തു മാറ്റിയതിനെത്തുടര്‍ന്ന് പിഞ്ചുകുഞ്ഞ് മരിച്ചു.

കൊല്‍ക്കത്ത മെഡിക്കല്‍കോളേജിലാണ് ദാരുണമായ സംഭവം നടന്നിരിക്കുന്നത്. ഇവിടെ ചികിത്സയിലായിരുന്ന ഒരു മാസം പ്രായമുള്ള ആണ്‍കുഞ്ഞാണ് മരിച്ചത്.

തൂപ്പുകാരനായ മോന്‍മോഹന്‍ റൗട്ടാണ് മദ്യപിച്ചെത്തി കുട്ടിയുടെ ഓക്സിജന്‍ മാസ്ക് എടുത്തുമാറ്റിയത്. ആരോപണം ശരിയാണെന്ന് തെളിഞ്ഞാല്‍ ഇയാള്‍ക്കെതിരെ നടപടിയെടുക്കുമെന്ന് ആശുപത്രി അധികൃതര്‍ പറയുന്നു.

ഇയാള്‍ ഇതിനുമുന്പും മദ്യപിച്ച് ലക്കുകെട്ട അവസ്ഥയില്‍ ജോലിയ്ക്കെത്തിയിട്ടുണ്ടെന്ന് ആശുപത്രിയിലെ ജീവനക്കാരില്‍ ചിലര്‍ പറയുന്നുണ്ട്. സംഭവം നടന്ന ദിവസം ഇയാള്‍ മദ്യപിച്ചാണ് വാര്‍ഡിലെത്തിയതെന്ന് കുഞ്ഞിന്റെ അമ്മയും ആരോപിക്കുന്നുണ്ട്. ഇവര്‍ ഉറങ്ങുന്പോഴാണത്രേ റൗട്ട് മുറിയിലെത്തി കുഞ്ഞിന്റെ മാസ്ക് മാറ്റിയത്. പിന്നീടെത്തിയ നഴ്സാണ് ഓക്സിജന്‍ മാക്സ് സ്ഥാനം തെറ്റിയിരിക്കുന്നതും കുഞ്ഞ് മരിച്ചതും കണ്ടെത്തിയത്.

സംഭവത്തില്‍ കേസെടുക്കാന്‍ പോലീസ് തയ്യാറായില്ലെന്നാരോപിച്ച് കുഞ്ഞിന്റെ ബന്ധുക്കള്‍ ആശുപത്രിക്കുപുറത്ത് പ്രതിഷേധിച്ചു. ആശുപത്രിഅധികൃതര്‍ക്ക് ഇതുസംബന്ധിച്ച് പരാതി നല്‍കിയിട്ടുണ്ട്.

സംഭവത്തെക്കുറിച്ചന്വേഷിക്കാന്‍ ഉത്തരവിട്ടതായി മെഡിക്കല്‍വിദ്യാഭ്യാസ ഡയറക്ടര്‍ സുശാന്ത ബാനര്‍ജി പറഞ്ഞു.

English summary

An inquiry commission has been set up to probe the death of a baby at Calcutta Medical College Hospital. It is suspected the 23-day-old infant died on Saturday after an "inebriated" sweeper at the paediatric ward pulled off the oxygen mask after fiddling with the knob,