കുഞ്ഞിനെ മോഷ്ടിച്ചെടുത്ത് വേശ്യാലയത്തിന് വിറ്റു

മുംബൈ: രണ്ട് മാസം പ്രായമുള്ള കുഞ്ഞിനെ മുംബൈയിലെ വേശ്യാത്തെരുവായ കാമാത്തിപുരയില്‍ നിന്നും പൊലീസ് രക്ഷിച്ചു. ഗിര്‍ഗോം പ്രദേശത്ത് നിന്ന് തട്ടിയെടുക്കപ്പെട്ട കുഞ്ഞിനെ 12000 രൂപയ്ക്കാണ് വേശ്യാലയം നടത്തിപ്പുകാര്‍ വാങ്ങിയിരുന്നത്.

സംഭവവുമായി ബന്ധപ്പെട്ട് രണ്ട് പേരെ പൊലീസ് അറസ്റ്റ് ചെയ്തു. കുഞ്ഞുങ്ങളെ തട്ടിയെടുത്ത് വേശ്യാലയങ്ങള്‍ക്ക് വില്‍ക്കുന്ന വന്‍സംഘം മുംബൈയില്‍ പ്രവര്‍ത്തിയ്ക്കുന്നുണ്ടെന്നാണ് പൊലീസ് കരുതുന്നത്.

ജനുവരി അഞ്ചിനാണ് ഗിര്‍ഗോം മൗലാന ഷൗക്കത്ത് അലി റോഡിന് സമീപം താമസിയ്ക്കുന്ന സല്‍മ ഷെയ്ഖിന്റെ രണ്ട് മാസം മാത്രം പ്രായമുള്ള സുഷമയെ കാണാതായത്. പിണങ്ങി വേറെ താമസിയ്ക്കുന്ന ഭര്‍ത്താവ് കുട്ടിയെ എടുത്തുകൊണ്ടുപോയെന്നാണ് സല്‍മ ആദ്യം കരുതിയിരുന്നത്. കുഞ്ഞ് ഭര്‍ത്താവിനൊപ്പമില്ലെന്ന് മനസ്സിലായതോടെ സല്‍മ പൊലീസില്‍ പരാതി നല്‍കുകയായിരുന്നു.

പൊലീസ് നടത്തിയ അന്വേഷത്തില്‍ കുഞ്ഞ് കാമത്തിപുരയിലുണ്ടെന്ന് സൂചനകള്‍ ലഭിച്ചു. തുടര്‍ന്ന് നടത്തിയ തിരച്ചിലില്‍ കുഞ്ഞിനെ കണ്ടെത്തുകയായിരുന്നു. സംഭവവുമായി ബന്ധപ്പെട്ട് അമര്‍ ശര്‍മ(28), ഷാഫി ഷെയ്ഖ് (40), എന്നിവരെ പൊലീസ് കസ്റ്റഡിയിലെടുത്തിട്ടുണ്ട്. അമര്‍ കുഞ്ഞിനെ മോഷ്ടിച്ച് വേശ്യാലയ നടത്തിപ്പുകാരനായ ഷാഫിയ്ക്ക് കൈമാറുകയായിരുന്നു. ഇവര്‍ക്കൊപ്പമുള്ളവരെക്കുറിച്ചും പൊലീസ് അന്വേഷണമാരംഭിച്ചിട്ടുണ്ട്.

English summary

Ttwo-month-old baby was stolen from Girgaum and later sold for Rs 12,000 to a brothel keeper in Kamathipura. Police managed to recover the baby and arrest the culprits on Sunday,