രണ്ടാം മാറാട്: മായിന്‍ഹാജി പ്രതി

കോഴിക്കോട്: രണ്ടാം മാറാട് കലാപത്തില്‍ മുസ്ലീം ലീഗ് സംസ്ഥാന സെക്രട്ടറി എം സി മായിന്‍ഹാജി, ലീഗ് ബേപ്പൂര്‍ മേഖലാ സെക്രട്ടറി പിപി മൊയ്തീന്‍ കോയ എന്നിവര്‍ക്കെതിരേ ക്രൈംബ്രാഞ്ച് കേസെടുത്തുവെന്ന റിപ്പോര്‍ട്ട് മാധ്യമം പുറത്തുവിട്ടു. ഒമ്പതുപേരുടെ മരണത്തിനിടയാക്കിയ ആക്രമണവുമായി ബന്ധപ്പെട്ട് ശിക്ഷാ നിയമം 302, 120 ബി, 109 വകുപ്പുകള്‍ പ്രകാരമാണ് കേസെടുത്തിട്ടുള്ളത്.

കൊലപാതകം, ക്രിമിനല്‍ ഗൂഡാലോചന, കലാപത്തിനുള്ള പ്രേരണ എന്നീ കുറ്റങ്ങളാണ് ചാര്‍ത്തിയിട്ടുള്ളത്. 2010 സെപ്തംബര്‍ 25ന് 507/cr/hh.w3/kkd ക്രൈം നമ്പറിലാണ് കേസ് രജിസ്റ്റര്‍ ചെയ്തിട്ടുള്ളത്. ഇതിന്റെ എഫ്‌ഐആര്‍ കോഴിക്കോട് ജൂഡീഷ്യല്‍ മജിസ്‌ട്രേട്ട് കോടതിയില്‍ സമര്‍പ്പിച്ചിരുന്നെങ്കിലും ഇതുവരെ പുറത്തുവിട്ടിരുന്നില്ല. കേസ് അന്വേഷിച്ചിരുന്ന ക്രൈംബ്രാഞ്ച് സംഘത്തിന് നേതൃത്വം കൊടുത്തിരുന്ന സിഎം പ്രദീപ് കുമാറിനെ മാറ്റിയത് വിവാദമായിരുന്നു.

രണ്ടാം മാറാട് കലാപം സിബിഐ അന്വേഷിക്കണമെന്ന് പ്രതിപക്ഷനേതാവ് വിഎസ് അച്യുതാനന്ദന്‍ ആവശ്യപ്പെട്ടിരുന്നു. മുഖ്യ അന്വേഷണ ഉദ്യോഗസ്ഥനെ മാറ്റിയത് മുസ്ലീം ലീഗിനുവേണ്ടിയാണെന്ന് സിപിഎം സംസ്ഥാന സെക്രട്ടറി പിണറായി വിജയന്‍ ആരോപിച്ചിരുന്നു.

English summary

Crimebranch filed case against muslim league leader mayin haji-madhyamam report