മഞ്ഞിടിച്ചിലില്‍ 9 സൈനികര്‍ മരിച്ചു

ശ്രീനഗര്‍: ജമ്മു കശ്മീരിലെ രണ്ടിടങ്ങളില്‍ കനത്ത ഹിമപാതത്തില്‍ ഒമ്പത് സൈനികര്‍ മരിച്ചതായി റിപ്പോര്‍ട്ട് ഇരുപതോളം പേരെ കാണാതായിട്ടുണ്ട്. ജമ്മുവിലെ സോനാമാര്‍ഗിലും ദാവറിലുമുള്ള സൈനിക ക്യാമ്പുകള്‍ക്ക് സമീപമാണ് മഞ്ഞിടിച്ചിലുണ്ടായത്. കൂടുതല്‍ സൈനികര്‍ ദുരന്തത്തില്‍പ്പെട്ടതായി സംശയിക്കുന്നു.ബുധനാഴ്ച രാത്രിയാണ് സംഭവം.

ദാവറിലെ സൈനിക ക്യാമ്പ് ഹിമപാതത്തില്‍ മഞ്ഞിനടിയിലായി. ഇവിടെ നിന്നു ആറു സൈനികരുടെ മൃതദേഹങ്ങള്‍ കണ്‌ടെടുത്തു. സോനാമാര്‍ഗിലാണ് രണ്ടാമത്തെ മഞ്ഞിടിച്ചിലുണ്ടായത്. ഇവിടെയും സൈനികരുടെ ക്യാമ്പുകള്‍ തകര്‍ന്നു. സോനാമര്‍ഗില്‍ മൂന്നു സൈനികര്‍ മരിച്ചതായി അധികൃതര്‍ സ്ഥിരീകരിച്ചു.

പുലര്‍ച്ചെ റാംവാരി മേഖലയിലും മഞ്ഞിടിച്ചിലുണ്ടായി. എന്നാല്‍ ഇവിടെ ആളപായം റിപ്പോര്‍ട്ടു ചെയ്തിട്ടില്ല. മോശം കാലാവസ്ഥ മൂലം രക്ഷാപ്രവര്‍ത്തനം മന്ദഗതിയിലാണെന്ന് സൈനികകേന്ദ്രങ്ങള്‍ അറിയിച്ചു. ദാവറില്‍ കനത്ത മഞ്ഞുവീഴ്ച മൂലം ഹെലിക്കോപ്റ്ററുകളുടെ സഹായം ലഭ്യമാക്കാന്‍ കഴിയില്ലെന്ന് സൈന്യം വ്യക്തമാക്കി. മരണസംഖ്യ ഉയരാന്‍ സാധ്യതയുണ്‌ടെന്നാണ് പ്രാഥമിക റിപ്പോര്‍ട്ടുകള്‍ സൂചിപ്പിക്കുന്നത്.