ജോണ്സന്റെ മകന് ബൈക്കപകടത്തില് മരിച്ചു
ചെന്നൈ: അന്തരിച്ച സംഗീതസംവിധായകന് ജോണ്സന്റെ മകന് ചെന്നൈയില് ബൈക്കപകടത്തില് മരിച്ചു. ചെന്നൈയില് വന്സാര്ബാക്കത്ത് സോഫ്റ്റ് വെയര് എന്ജീനിയറായ റെന് ജോണ്സന് (25) ആണ് മരിച്ചത്. ശനിയാഴ്ച ഉച്ചയ്ക്ക് ഒരു മണിയോടെ ജോലിക്കു പോകുമ്പോഴായിരുന്നു അപകടം.
റെന് സഞ്ചരിച്ച ബൈക്ക് ചെന്നൈ അഡയാര് മധ്യകൈലാഷില് വഴിയാത്രക്കാരിയെ ഇടിച്ചശേഷം നിയന്ത്രണംവിട്ട് റോഡിന്റെ മീഡിയനിലിടിച്ച് മറിയുകയായിരുന്നു. ഗുരുതരമായ പരിക്കുകളോടെ തൊട്ടടുത്ത സ്വകാര്യ ആശുപത്രിയില് എത്തിച്ചെങ്കിലും രക്ഷിക്കാനായില്ല. ബൈക്കിടിച്ച് പരിക്കേറ്റ യാത്രക്കാരി അബോധാവസ്ഥയില് ചികിത്സയിലാണ്.
ഷാന് എന്ന സഹോദരിക്കും അമ്മ റാണിയ്ക്കുമൊപ്പമാണ് റെന് ചെന്നൈയില് താമസിക്കുന്നത്. റെനിന്റെ മൃതദേഹം തൃശൂരിലെ നെല്ലിക്കുന്നിലെ താവാട്ട് വീട്ടില് കൊണ്ടു വരും. ഉച്ചകഴിഞ്ഞു നെല്ലിക്കുന്ന് സെന്റ്. സെബാസ്റ്റിയന് പള്ളിയില് സംസ്കരിക്കും. കഴിഞ്ഞ വര്ഷം ഓഗസ്റ്റ് പതിനെട്ടിനാണു ജോണ്സന് ഹൃദയാഘാതത്തെത്തുടര്ന്ന് മരിച്ചത്.