വിഎസ്-പിണറായി തര്‍ക്കം തീര്‍ക്കാന്‍ ചന്ദ്രചൂഢന്‍

തിരുവനന്തപുരം: ഔദ്യോഗിക നേതൃത്വത്തിനെതിരേ പരസ്യമായി രംഗത്തെത്തിയ വിഎസ് അച്യുതാനന്ദനെ അനുനയിപ്പിക്കാന്‍ ആര്‍എസ്പി ജനറല്‍ സെക്രട്ടറി ടിജെ ചന്ദ്രചൂഢന്‍. തിങ്കളാഴ്ച രാവിലെ കന്റോണ്‍മെന്റ് ഹൗസിലെത്തിയ ചന്ദ്രചൂഢന്‍ വി.എസുമായി ഒരു മണിക്കൂറോളം ചര്‍ച്ച നടത്തി. വിഎസുമായി രാഷ്ട്രീയം ചര്‍ച്ച ചെയ്തുവെന്ന് ചന്ദ്രചൂഢന്‍ അറിയിച്ചു. തന്റേത് സ്വകാര്യ സന്ദര്‍ശമല്ലെന്ന് വ്യക്തമാക്കിയ ചന്ദ്രചൂഢന്‍ പക്ഷേ കൂടുതല്‍ കാര്യങ്ങള്‍ വെളിപ്പെടുത്താന്‍ തയ്യാറായില്ല.

പാര്‍ട്ടി ജനറല്‍ സെക്രട്ടറിയായി തെരഞ്ഞെടുക്കപ്പെട്ട ശേഷം വിഎസിനെ സന്ദര്‍ശിച്ചിട്ടില്ല. അതുകൊണ്ടാണ് വന്നത്. വിഎസുമായി മുന്നണി രാഷ്ട്രീയം ഉള്‍പ്പെടെയുള്ള കാര്യങ്ങള്‍ ചര്‍ച്ച ചെയ്തു. എന്നാല്‍ അതൊന്നും മാധ്യമങ്ങളുമായി പങ്കുവയ്‌ക്കേണ്ട കാര്യമില്ല. നല്ല ലക്ഷ്യത്തോടെയാണ് താന്‍ സന്ദര്‍ശനം നടത്തിയത്. ഏതെങ്കിലും പ്രത്യേക ദൗത്യവുമായല്ല താനിവിടെ എത്തിയിരിക്കുന്നത്. നിലവില്‍ സിപിഎമ്മില്‍ ഒരു സംഘര്‍ഷ സ്ഥിയാണ് ഉള്ളത്. അത് കൂട്ടാന്‍ താന്‍ ഉദ്ദേശിക്കുന്നില്ലെന്നും ചന്ദ്രചൂഢന്‍ പറഞ്ഞു.

പിണറായി ഉള്‍പ്പെടെയുള്ള നേതാക്കളുടെ അനുമതിയോടെയാണ് ചന്ദ്രചൂഢന്‍ അനുരഞ്ജന ശ്രമവുമായി വിഎസിനെ സമീപിച്ചതെന്നാണ് സൂചന. മുന്‍പും സിപിഎമ്മില്‍ പിണറായിയും വിഎസും തമ്മിലുള്ള തര്‍ക്കങ്ങള്‍ ഉടലെടുത്തപ്പോള്‍ ചന്ദ്രചൂഢന്‍ മധ്യസ്ഥന്റെ വേഷമണിഞ്ഞിട്ടുണ്ട്.

English summary

Revolutionary Socialist Party (RSP) general secretary TJ Chandrachoodan has called on V.S. Achuthanandan and CPI(M) State secretary Pinarayi Vijayan in a bid to defuse the crisis gripping the CPI(M).