ആര്‍എംപി നേതാക്കള്‍ വിഎസുമായി കൂടിക്കാഴ്ച നടത്തി

തിരുവനന്തപുരം: റവല്യൂഷണറി മാര്‍ക്‌സിസ്റ്റ് പാര്‍ട്ടി നേതാക്കള്‍ പ്രതിപക്ഷ നേതാവ് വി.എസ് അച്യുതാനന്ദനുമായി കൂടിക്കാഴ്ച നടത്തി. തിരുവനന്തപുരത്ത് വി.എസിന്റെ ഔദ്യോഗിക വസതിയില്‍ രാവിലെ ഒന്‍പത് മണിക്ക് മുന്‍പായിരുന്നു കൂടിക്കാഴ്ച. പുതിയ രാഷ്ട്രീയസാഹചര്യങ്ങളില്‍ വിഎസ്സും ആര്‍എംപി നേതാക്കളുമായുള്ള ചര്‍ച്ചയ്ക്ക് വലിയ രാഷ്ട്രീയപ്രധാന്യമാണ് കല്‍പ്പിയ്ക്കപ്പെടുന്നത്.

ആര്‍എംപി നേതാക്കളായ എന്‍. വേണു, പി. കുമാരന്‍കുട്ടി എന്നിവരുള്‍പ്പെടെയാണ് വി.എസുമായി കൂടിക്കാഴ്ച നടത്തിയത്. ചര്‍ച്ചയെക്കുറിച്ച് ആര്‍എംപി നേതാക്കളോ വി.എസോ പ്രതികരിച്ചിട്ടില്ല. ആലപ്പുഴയില്‍ പൊതു പരിപാടിയില്‍ പങ്കെടുക്കേണ്ടതിനാല്‍ കൂടിക്കാഴ്ചയ്ക്ക് ശേഷം വി.എസ് ആലപ്പുഴയിലേക്ക് തിരിച്ചു. ഞായറാഴ്ചയാണ് ആര്‍എംപി നേതാക്കള്‍ കോഴിക്കോട് നിന്നും തിരുവനന്തപുരത്ത് എത്തിയത്.

ആര്‍എംപി നേതാവായിരുന്ന ടി.പി. ചന്ദ്രശേഖരന്റെ കൊലപാതകവുമായി ബന്ധപ്പെട്ട് സിപിഎം ഔദ്യോഗിക നേതൃത്വത്തിനെതിരേ പരസ്യമായി വി.എസ് രംഗത്തെത്തിയിരുന്നു. ഇതിന് പിന്നാലെയാണ് വിഎസ്സുമായി ആര്‍എംപി നേതാക്കള്‍ നേരിട്ട ്ചര്‍ച്ച നടത്തിയിരിക്കുന്നത്.