മുല്ലപ്പെരിയാര്‍: കേരളത്തിന്റെ ആവശ്യം തള്ളി

By Ajith Babu

Updated: Monday, July 23, 2012, 14:11 [IST]

ദില്ലി: മുല്ലപ്പെരിയാര്‍ ഡാമില്‍ അറ്റകുറ്റപ്പണി നടത്തുന്നതിന് തമിഴ്‌നാടിന് സുപ്രീംകോടതി അനുമതി നല്‍കി. ഇതിനായി കേരളത്തിന്റെയും തമിഴ്‌നാടിന്റെയും സൂപ്രണ്ടിംഗ് എഞ്ചിനിയര്‍മാര്‍ ഉള്‍പ്പെട്ട മൂന്നംഗ സമിതിയെ നിയോഗിക്കാനും അഞ്ചംഗഭരണഘടനാ ബഞ്ച് നിര്‍ദ്ദേശിച്ചു. കേന്ദ്ര ജലക്കമ്മീഷനിലെ ഒരാളാകും സമിതിയിലെ മൂന്നാമത്തെ അംഗം.

അറ്റകുറ്റപ്പണിക്ക് തമിഴ്‌നാടിനെ അനുവദിക്കരുതെന്ന് കേരളം ആവശ്യപ്പെട്ടിരുന്നെങ്കിലും അത് കോടതി തള്ളുകയായിരുന്നു. മുല്ലപ്പെരിയാറില്‍ തല്‍സ്ഥിതി തുടരണമെന്ന നിലപാട് സ്വീകരിച്ച കേരളത്തിന് തിരിച്ചടിയാണ് കോടതിയുടെ ഉത്തരവ്.

ഡാം സേഫ്റ്റി സ്റ്റാന്‍ഡേര്‍ഡ് അനുസരിച്ച് അണക്കെട്ടില്‍ അറ്റകുറ്റപ്പണി നടത്തിയിട്ടില്ലെന്ന് ഉന്നതാധികാര സമിതിയുടെ റിപ്പോര്‍ട്ടില്‍ ചൂണ്ടിക്കാട്ടിയിട്ടുണ്‌ടെന്നും സുരക്ഷ കണക്കിലെടുത്ത് അറ്റകുറ്റപ്പണി നടത്താന്‍ അനുവദിക്കണമെന്നുമായിരുന്നു തമിഴ്‌നാടിന്റെ ആവശ്യം. അറ്റകുറ്റപ്പണി നടത്തേണ്ട ആവശ്യത്തെക്കുറിച്ച് ഉന്നതാധികാര സമിതിയിലെ സാങ്കേതിക വിദഗ്ധര്‍ ചൂണ്ടിക്കാട്ടിയിരുന്നതായും തമിഴ്‌നാട് ചൂണ്ടിക്കാട്ടിയിരുന്നു.

അതേസമയം മുല്ലപ്പെരിയാറില്‍ നിന്ന് വള്ളക്കടവിലേക്കുള്ള റോഡ് അറ്റകുറ്റപ്പണി നടത്താനും മരങ്ങള്‍ വെട്ടിമാറ്റാനും ബേബി ഡാമിന് മുകളിലേക്കുള്ള മരങ്ങള്‍ വെട്ടിമാറ്റാനും അനുവദിക്കണമെന്ന തമിഴ്‌നാടിന്റെ ആവശ്യത്തോട് കോടതി അനുകൂല നിലപാട് സ്വീകരിച്ചില്ല. ഇക്കാര്യത്തില്‍ വനം പരിസ്ഥിതി മന്ത്രാലയത്തെ സമീപിക്കാനാണ് കോടതിയുടെ നിര്‍ദേശം.

ഉന്നതാധികാര സമിതിയുടെ റിപ്പോര്‍ട്ടിന് ആധാരമാക്കിയ പഠന റിപ്പോര്‍ട്ടുകളുടെ പകര്‍പ്പുകള്‍ ലഭ്യമാക്കണമെന്ന കേരളത്തിന്റെ ആവശ്യം കോടതി അംഗീകരിച്ചു. ഉന്നതാധികാര സമിതിയുടെ റിപ്പോര്‍ട്ടിന്റെ പകര്‍പ്പ് ഇരു സംസ്ഥാനങ്ങള്‍ക്കും നല്‍കാനും സുപ്രീംകോടതി നിര്‍ദ്ദേശിച്ചു. ആഗസ്റ്റ് 31ന് കേസ് വീണ്ടും പരിഗണിക്കും.