സീരിയല്‍ നടി കുത്തേറ്റ് മരിച്ചു

മുക്കം: സീരിയലില്‍ അഭിനയിക്കുന്നതിനെച്ചൊല്ലിയുണ്ടായ തര്‍ക്കത്തിനൊടുവില്‍ നടിയെ ഭര്‍ത്താവ് കുത്തിക്കൊന്നു. വ്യാഴാഴ്ച രാത്രി എട്ടരയോടെയാണ് സംഭവം. പന്നിക്കോട് കാരാളിപ്പറമ്പ് കൂടത്തില്‍പറമ്പില്‍ വര്‍ഷയെ (22) യാണ് കൊല്ലപ്പെട്ടത്. സംഭവത്തെ തുടര്‍ന്ന് വര്‍ഷയുടെ ഭര്‍ത്താവായ സജീവ് (26) നെ പൊലീസ് കസ്റ്റഡിയിലെടുത്തു. സംഭവത്തില്‍ പരിക്കേറ്റ വര്‍ഷയുടെ അമ്മ ബേബിയെ ഓമശ്ശേരിയിലെ സ്വകാര്യ ആശുപത്രിയില്‍ പ്രവേശിപ്പിച്ചിരിക്കുകയാണ്.

വര്‍ഷ സീരിയലില്‍ അഭിനയിക്കാന്‍ പോകുന്നത് ഭര്‍ത്താവായ സജീവിന് ഇഷ്ടമുണ്ടായിരുന്നില്ല. ഇതെ ചൊല്ലി വഴക്കടിച്ച ഇരുവരും ഒരു വര്‍ഷത്തോളമായി വേര്‍പിരിഞ്ഞ് കഴിയുകയാണ്. സീരിയല്‍ അഭിനയം കഴിഞ്ഞ് വര്‍ഷ തിരികെ എത്തിയിട്ടുണ്ടെന്ന വിവരമറിഞ്ഞ സജീവന്‍ പുതുക്കോട്ടെ ഇവരുടെ താമസസ്ഥലത്ത് എത്തുകയായിരുന്നു.

തുടര്‍ന്ന് ഇരുവരും തമ്മില്‍ വാക് തര്‍ക്കം ഉണ്ടാവുകയും സജീവന്‍ കയ്യില്‍ കരുതിയ കത്തിയെടുത്ത് വര്‍ഷയെ കുത്തുകയുമായിരുന്നു. ഇത് തടയാന്‍ ശ്രമിക്കുന്നതിനിടെയാണ് വര്‍ഷയുടെ അമ്മയ്ക്ക് പരിക്കേറ്റത്. കൊലപാതകത്തിന് ശേഷം ആത്മഹത്യാശ്രമം നടത്തിയ സജീവന്റെ കൈയ്ക്ക് പരിക്കുണ്ട്. രണ്ടു വര്‍ഷം മുന്‍പാണ് കീഴ്‌ശ്ശേരി വളപ്പില്‍ കുണ്ടില്‍ സ്വദേശിയായ സജീവന്‍ വര്‍ഷയെ വിവാഹം ചെയ്തത്. കോണ്‍ക്രീറ്റ് തൊഴിലാളിയാണ് ഇയാള്‍.

English summary

Varsha(22), serial actress, was stabbed to death by her husband.