ഐഒസിക്കെതിരെ കൊലക്കുറ്റത്തിന്‌ കേസെടുക്കണം:വിഎസ്‌

കണ്ണൂര്‍: ഇന്ത്യന്‍ ഓയില്‍ കോര്‍പറേഷനെതിരെ കൊലക്കുറ്റത്തിന്‌ കേസെടുക്കണം എന്ന്‌ പ്രതിപക്ഷ നേതാവ്‌ വിഎസ്‌ അച്യുതാനന്ദന്‍ അഭിപ്രായപ്പെട്ടു. ഐഒസിയുടെ ടാങ്കര്‍ ലോറി കണ്ണൂര്‍ ചാലയില്‍ അപകടത്തില്‍ പെട്ട്‌ പൊട്ടിത്തെറിച്ച്‌ പതിനഞ്ച്‌ ജീവന്‍ പൊലിഞ്ഞ സാഹചര്യത്തിലാണ്‌ വിഎസ്‌ ഇങ്ങനെയൊരു ആവശ്യവുമായി രംഗത്തെത്തിയിരിക്കുന്നത്‌.

അപകടത്തെ കുറിച്ച്‌ ഉന്നത തല അന്വേഷണം നടത്തണം. സര്‍ക്കാര്‍ പ്രഖ്യാപിച്ചിരിക്കുന്ന പത്ത്‌ ലക്ഷം രൂപയ്‌ക്ക്‌ പുറമെ നഷ്ടപരിഹാരമായി ഐഒസി ഒരു പത്ത്‌ ലക്ഷം കൂടി നല്‍കണം. സമഗ്രമായ പുനരധിവാസ പാക്കേജ്‌ നടപ്പിലാക്കണം. പ്രതിപക്ഷ നേതാവ്‌ ആവശ്യപ്പെട്ടു.

പൊട്ടിത്തെറി നടന്ന സ്ഥലം സന്ദര്‍ശിച്ച ശേഷം വാര്‍ത്താ സമ്മേളനത്തില്‍ സംസാരിക്കുകയായിരുന്നു വിഎസ്‌. സിപിഎം സംസ്ഥാന സെക്രട്ടറി, പിണറായി വിജയന്‍, കോടിയേരി ബാലകൃഷ്‌ണന്‍, സിപിഐ നേതാവ്‌ സി ദിവാകരന്‍, പിടി തോമസ്‌, എംവി ജയരാജന്‍, പികെ ശ്രീമതി ടീച്ചര്‍, ടിവി രാജേഷ്‌, എന്‍സിപി നേതാവ്‌ എകെ ശശീന്ദ്രന്‍ എന്നിവരടങ്ങിയ ഇടതു നേതാക്കളുടെ സംഘത്തോടൊപ്പം ആണ്‌ വിഎസ്‌ ദുരന്തം നടന്ന സ്ഥലം സന്ദര്‍ശിച്ചത്‌.

English summary

VS Achuthanandan demanded to file a case against Indian Oil Corporation for murder. He told so after visiting the place where a tanker lorry exploded and caused for loss of 15 lives.