സുധാകര പ്രസംഗം: ഹര്‍ജികള്‍ തള്ളി

തിരുവനന്തപുരം: വിവാദപ്രസംഗത്തെ തുടര്‍ന്ന് കെ.സുധാകരനെതിരെ രജിസ്റ്റര്‍ ചെയ്ത കേസുമായി ബന്ധപ്പെട്ട് സമര്‍പ്പിച്ചിട്ടുളള വിവിധ ഉപഹര്‍ജികള്‍ തിരുവനന്തപുരം ഒന്നാം ക്ലാസ് ജുഡീഷ്യല്‍ മജിസ്‌ട്രേട്ട് കോടതി തള്ളി. കേസ് പരിഗണിക്കാന്‍ തിരുവനന്തപുരം മജിസ്‌ട്രേട്ട് കോടതിക്ക് അധികാരമില്ലെന്നും കേസ് മറ്റൊരു കോടതിയിലേക്ക് മാറ്റണമെന്നും കാട്ടി സുധാകരന്‍ സമര്‍പ്പിച്ച രണ്ടു ഹര്‍ജികളും ജഡ്ജി ഇജ്ജാസ് തള്ളി.

പൊതുപ്രവര്‍ത്തകര്‍ വാക്കുകള്‍ പ്രയോഗിക്കുമ്പോള്‍ സൂക്ഷിക്കണമെന്നും കോടതി പറഞ്ഞു. കോടതിയെ അധിക്ഷേപിച്ചതിന് സുധാകരനെതിരെ നല്‍കിയ കോടതിയലക്ഷ്യക്കേസും ഹൈക്കോടതിയുടെയും സുപ്രീംകോടതിയുടെയും വിധികള്‍ ഹാജരാക്കണമെന്ന് ആവശ്യപ്പെട്ട ഹര്‍ജിയും തള്ളി.

21 ബാറുകള്‍ അനുവദിക്കുന്നത് സംബന്ധിച്ച് ഹൈക്കാടതി വിധി റദ്ദാക്കിക്കാന്‍ സുപ്രീംകോടതി ജഡ്ജി 36 ലക്ഷം രൂപ കൈക്കൂലി വാങ്ങിയത് താന്‍ നേരിട്ട് കണ്ടുവെന്ന സുധാകരന്റെ വിവാദ പ്രസംഗത്തെ തുടര്‍ന്നാണ് കേസുണ്ടായത്. കൊട്ടാരക്കരയില്‍ ആര്‍ ബാലകൃഷ്ണപിള്ളക്ക് നല്‍കിയ സ്വീകരണത്തിലായിരുന്നു പ്രസംഗം.