ലീഗിനെ കുത്തിനോവിച്ച് ആര്യാടന്‍

തിരുവനന്തപുരം: മന്ത്രി അനൂപ് ജേക്കബിന്റെ കേരള കോണ്‍ഗ്രസിനുള്ള അധികാരമേ മുന്നണിയില്‍ മുസ്ലിം ലീഗിനും ഉള്ളൂവെന്ന് മന്ത്രി ആര്യാടന്‍ മുഹമ്മദ്. അതിലേറെ അധികാരം അവര്‍ക്കില്ല. മുന്നണിയില്‍ എല്ലാ കക്ഷികളും തുല്യരാണ്. അതാണ് ശരി. പക്ഷേ മുന്നണിയെ നയിക്കുന്ന പാര്‍ട്ടി കോണ്‍ഗ്രസാണ്.

യു.ഡി.എഫിന്റെ പ്രവര്‍ത്തനത്തിനെതിരെ ലീഗ് ഉന്നയിച്ച വിമര്‍ശം സംബന്ധിച്ച മാധ്യമപ്രവര്‍ത്തകരുടെ ചോദ്യങ്ങള്‍ക്ക് മറുപടി പറയുകയായിരുന്നു ആര്യാടന്‍. ലീഗിനെതിരെ ആര്യാടന്‍ പരസ്യമായി രംഗത്തെത്തിയതോടെ യുഡിഎഫിലെ പ്രതിസന്ധിയ്ക്ക് ആഴമേറിയിരിക്കുകയാണ്.

ലീഗാണ് സംസ്ഥാനത്ത് ഭരണം നടത്തുന്നതെന്ന വിശ്വാസം ജനങ്ങളിലുണ്ടെന്നും അത് തിരുത്തുന്നതാണ് ലീഗിനും കോണ്‍ഗ്രസിനും നല്ലതെന്നുമാണ് ആര്യാടന്‍ ഇന്നലെ ഒരു ടെലിവിഷന്‍ ചാനലിന് നല്‍കിയ അഭിമുഖത്തില്‍ തുറന്നടിച്ചത്. പിന്നീട് വാര്‍ത്താസമ്മേളനത്തിലും ആര്യാടന്‍ നിലപാട് ആവര്‍ത്തിച്ചു.

കോണ്‍ഗ്രസിന്റെ ശക്തി എല്ലാക്കാലത്തെക്കാളും ഇപ്പോള്‍ കൂടിയിരിക്കുകയാണ്. കാബിനറ്റില്‍ രണ്ടഭിപ്രായം ഉണ്ടായിരുന്ന കാലമുണ്ടായിരുന്നു. ആ കാലമെല്ലാം പോയി. ഭരണത്തില്‍ കെട്ടുറപ്പില്ലെന്ന സി.എം.പിയുടെ പരാതി ചൂണ്ടിക്കാട്ടിയപ്പോള്‍ അവര്‍ ഇപ്പോള്‍ ഭരണത്തില്‍ ഇല്ലല്ലോ എന്നായിരുന്നു പ്രതികരണം.

ലീഗിനെ മുന്നണിയില്‍ ചിലര്‍ ഒറ്റപ്പെടുത്തി ആക്രമിക്കാന്‍ ശ്രമിക്കുകയാണെന്ന് കഴിഞ്ഞ ദിവസം പി.കെ. കുഞ്ഞാലിക്കുട്ടിയുടെ നേതൃത്വത്തില്‍ ലീഗ് നേതാക്കള്‍ മുഖ്യമന്ത്രിയെ കണ്ട് പരാതി പറഞ്ഞിരുന്നു. ലീഗില്‍ ചിലര്‍ വര്‍ഗീയത ആരോപിക്കുകയും ചിലര്‍ അതു കണ്ട് ആസ്വദിക്കുകയുമാണെന്ന് ലീഗ് ജനറല്‍ സെക്രട്ടറി കെ.പി.എ. മജീദ് പിന്നീട് കോഴിക്കോട്ടും പറയുകയുണ്ടായി. കോണ്‍ഗ്രസിലെ ചില നേതാക്കളെയും ചില ഘടകകക്ഷികളെയുമായിരുന്നു ലീഗ് ഉന്നംവച്ചത്.

അതിനുള്ള മറുപടിയാണ് ആര്യാടനില്‍നിന്ന് ഇന്നലെയുണ്ടായത്. ലീഗ് പറയുന്നതേ സംസ്ഥാനത്ത് നടക്കുകയുള്ളൂ എന്ന മന്ത്രി ഇബ്രാഹിംകുഞ്ഞിന്റെ വിവാദ പ്രസംഗത്തെ കുടയാനും ആര്യാടന്‍ തയ്യാറായി എന്നത് ശ്രദ്ധേയമാണ്.