ഉഡുപ്പിയില്‍ വാഹനാപകടം: 4 മലയാളികള്‍ മരിച്ചു

മംഗലാപുരം: മൂകാംബിക ക്ഷേത്രദര്‍ശനം കഴിഞ്ഞ് മടങ്ങുകയായിരുന്ന മലയാളി കുടുംബം സഞ്ചരിച്ച ടാറ്റാസുമോ ഗ്യാസ് സിലിണ്ടര്‍ കൊണ്ടുവരികയായിരുന്ന ലോറിയിലിടിച്ച് നാലു പേര്‍ മരിച്ചു. അഞ്ചുപേര്‍ക്ക് പരിക്കേറ്റു.

പെരുമ്പാവൂര്‍ സ്വദേശികളായ ഷാജി(43), വിജയന്‍(52), ശാന്ത (47), ജയന്തി (47) എന്നിവരാണ് മരിച്ചത്. ഉഡുപ്പിക്കടുത്ത് പടുബിദ്രി പൊലീസ് സ്‌റ്റേഷന്‍ പരിധിയില്‍പ്പെട്ട തെങ്കയേര്‍മാനിലാണ് അപകടമുണ്ടായത്. ലോറി ഡ്രൈവര്‍ ഓടി രക്ഷപെട്ടു.

വെങ്ങോലയില്‍ ഫര്‍ണിച്ചര്‍ കട നടത്തുന്ന ഷാജിയുടെ നേതൃത്വത്തിലാണ് ഒമ്പതംഗസംഘം തിങ്കളാഴ്ച പുലര്‍ച്ചെ പെരുമ്പാവൂരില്‍നിന്ന് മൂകാംബികയിലേക്ക് തിരിച്ചത്. തിങ്കളാഴ്ച രാത്രി 8.45ഓടെയാണ് അപകടം സംഭവിച്ചത്.

ഷാജിയുടെ ഭാര്യ ലളിത (40), മകള്‍ അരുണിമ (14), സുഭാഷിന്റെ മകന്‍ നന്ദു (11), ജയന്തിയുടെ മകന്‍ കണ്ണന്‍ (12), ബാബു (45) എന്നിവര്‍ക്കാണ് പരിക്കേറ്റത്. രണ്ടുകുട്ടികളടക്കം നാലുപേരെ ഗുരുതരപരിക്കോടെ മംഗലാപുരം എ.ജെ ആശുപത്രിയില്‍ പ്രവേശിപ്പിച്ചു. സാരമായി പരിക്കേറ്റ ഒരു സ്ത്രീ മണിപ്പാല്‍ കസ്തൂര്‍ബാ മെഡിക്കല്‍ കോളജ് ആശുപത്രിയിലാണ്. എല്ലാവരും അബോധാവസ്ഥയിലാണ്. ഷാജി ഉള്‍പ്പെടെ മരിച്ച മൂന്നുപേരുടെ മൃതദേഹങ്ങള്‍ മണിപ്പാല്‍ ആശുപത്രിയിലാണ്.

English summary

Four persons were killed and five injured in a collision between a sports utility vehicle (SUV) and a lorry on National Highway 66 at Yermal village near Padubidri in Udupi district on Monday.