തിലകന്റെ ഫ്ലാറ്റില് ആദ്യ ഭാര്യയ്ക്ക് വിലക്ക്
തിലകന്റെ ആദ്യ ഭാര്യയും മക്കളും ഫ്ലാറ്റില് പ്രവേശിക്കുന്നതു തടയണമെന്നു സോണിയ തന്റെ അഭിഭാഷകനായ ഫത്തഹുദീന് മുഖേന ആവശ്യപ്പെട്ടിരുന്നു. ഇവരെ ഫ്ലാറ്റില് പ്രവേശിപ്പിച്ചാല് അതു സോണിയയുടെ സ്വൈര്യ ജീവിതത്തെ ബാധിക്കുമെന്നായിരുന്നു അഭിഭാഷകന് വാദിച്ചത്. സോണിയയെ ഉപദ്രവിക്കാന് വേണ്ടി മാത്രമാണ് ആദ്യ ഭാര്യയും മക്കളും ഫ്ലാറ്റില് പ്രവേശിക്കാന് ശ്രമിക്കുന്നതെന്നും അഭിഭാഷകന് കോടതിയെ അറിയിച്ചു.
അതേസമയം സോണിയയെ ബലമായി ഒഴിപ്പിക്കുകയോ പുരസ്കാരങ്ങള് കൈവശപ്പെടുത്തുകയോ ചെയ്യില്ലെന്നു കാണിച്ച് ആദ്യ ഭാര്യയും മകളും കോടതിയില് സത്യവാങ്മൂലം സമര്പ്പിച്ചിരുന്നു. തിലകന്റെ ആദ്യ ഭാര്യയിലെ മക്കളിലൊരാളായ ഷോബി തിലകന് തന്നെ ഭീഷണിപ്പെടുത്തുന്നുവെന്നും തിലകന് ലഭിച്ച പുരസ്കാരങ്ങള് അടക്കമുള്ളവ കടത്താന് ശ്രമം നടക്കുന്നുണ്ടെന്നും കാണിച്ച് സോണിയ കോടതിയെ സമീപിച്ചതോടെയാണ് സംഭവം വിവാദമായത്.