കോണ്ഗ്രസിന്റെ അംഗീകാരം റദ്ദാക്കണം: സ്വാമി
അസോസിയേറ്റഡ് ജേര്ണല്സ് എന്ന പബ്ലിക് ലിമിറ്റഡ് കമ്പനി സ്വന്തമാക്കുന്നതിന് സോണിയാ ഗാന്ധിയും രാഹുല് ഗാന്ധിയും ചേര്ന്ന് യങ് ഇന്ത്യന് എന്ന പ്രൈവറ്റ് ലിമിറ്റഡ് കമ്പനിയുണ്ടാക്കിയതില് ക്രമവിരുദ്ധമായ ഒട്ടേറെ കാര്യങ്ങളുണ്ടെന്ന് സ്വാമി ആരോപിച്ചിരുന്നു.
സോണിയയുടെയും രാഹുലിന്റെയും കമ്പനിയ്ക്ക് പണം വായ്പയായി നല്കിയിട്ടുണ്ടെന്ന് കോണ്ഗ്രസ് സമ്മതിച്ചിട്ടുണ്ട്. എന്നാല് യാതൊരു വിധ പലിശയും ഈടാക്കാത്ത ഈ വായ്പയില് അസ്വാഭാവികമായി ഒന്നുമില്ലെന്നാണ് കോണ്ഗ്രസിന്റെ നിലപാട്. സ്വാതന്ത്ര്യസമരവുമായി ബന്ധപ്പെട്ട രണ്ടു പത്രങ്ങളെ സംരക്ഷിക്കേണ്ടത് പാര്ട്ടിയുടെ ബാധ്യതയാണെന്ന് പാര്ട്ടി വക്താവ് പിസി ചാക്കോ അറിയിച്ചു.
അതേ സമയം പബ്ലിക് ലിമിറ്റഡ് കമ്പനിയെ രാഹുലിന്റെയും സോണിയയുടെയും സ്വകാര്യ സ്വത്താക്കി മാറ്റി 1600കോടിയുടെ ആസ്തികള് തട്ടിയെടുക്കുകയായിരുന്നുവെന്നാണ് സ്വാമിയുടെ പരാതി. കൂടാതെ ഈ കമ്പനിയില് 38 ശതമാനം ഓഹരികളുള്ള രാഹുല് ഗാന്ധി ഇക്കാര്യം തിരഞ്ഞെടുപ്പ് സത്യവാങ് മൂലത്തില് വ്യക്തമാക്കിയിട്ടില്ലെന്നും മുന് കേന്ദ്രമന്ത്രി കൂടിയായ സ്വാമി ആരോപിച്ചിരുന്നു.