വാര്ഡനെ അക്രമിച്ച് പ്രതികള് ജയില്ചാടി
ജയിലിലെ പാചകത്തിനായി നിയോഗിച്ചിരുന്ന റിമാന്ഡ് പ്രതികളാണ് ജയില് ചാടിയത്. പാചകപ്പുരയിലെത്തിയ ഇവര് ചപ്പാത്തി ഉണ്ടാക്കുന്ന മിഷ്യന് കൊണ്ട് വാര്ഡനെ തലയ്ക്കടിച്ചു വീഴ്ത്തുകയായിരുന്നു. തുടര്ന്ന് അവിടെയുണ്ടായിരുന്ന കത്തി ഉപയോഗിച്ച് വാര്ഡനെ കുത്തിപ്പരിക്കേല്പിച്ച ശേഷം ജയിലിന്റെ മുന്ഭാഗത്തെ മതില് ചാടിയാണ് ഇവര് രക്ഷപെട്ടെതെന്ന് പൊലീസ് അറിയിച്ചു.
റിമാന്ഡ് പ്രതികളായ ഇക്ബാല്, തെക്കന് രാജന്, റഫീഖ്, രാജേഷ് എന്നിവരാണു ജയില് ചാടിയത്. ഇതില് തെക്കന് രാജന്, രാജേഷ് എന്നിവര് ചാരായക്കേസ് പ്രതികളാണ്. ഇക്ബാല് കൊലക്കേസ് പ്രതിയാണെന്നാണു സൂചന.
ജയില് വാര്ഡന് പവിത്രനെ കുത്തി പരുക്കേല്പ്പിച്ച ശേഷമാണ് ഇവര് രക്ഷപെട്ടത്. കാലിനും തലയ്ക്കും സാരമായി പരിക്കേറ്റ വാര്ഡന് പവിത്രനെ കാസര്ഗോഡ് ജനറല് ആശുപത്രിയില് പ്രവേശിപ്പിച്ചു. പ്രതികളെ കുറിച്ച് ഇതുവരെ സൂചനയൊന്നും ലഭിച്ചിട്ടില്ല. തടവുചാടിയവര്ക്കായി പൊലീസ് തെരച്ചില് തുടരുന്നു.