എഫ്‍ഡിഐ: യുഡിഎഫ് എംപിമാര്‍ പിന്തുണച്ചു

ദില്ലി: ചില്ലറവിപണിയിലെ വിദേശനിക്ഷേപത്തെ (എഫ്ഡിഐ) കേരളത്തില്‍ ശക്തിയുക്തം എതിര്‍ക്കുന്ന യുഡിഎഫ് എംപിമാര്‍ ദില്ലിയിലെത്തിയപ്പോള്‍ കാലുമാറ്റിച്ചവുട്ടി. സംസ്ഥാനത്തെ യുഡിഎഫ് എംപിമാര്‍ക്കെല്ലാംം വിദേശനിക്ഷേപത്തിന് അനുകൂലമായി ലോക് സഭയില്‍ വോട്ട് ചെയ്യേണ്ട ഗതികേടാണുണ്ടായത്. എന്നാല്‍ചര്‍ച്ചകളില്‍ ഇടപെടാതിരിക്കാന്‍ ഇവര്‍ പ്രത്യേകം ശ്രദ്ധിച്ചു. കേരളത്തില്‍ എതിര്‍ക്കുന്ന തീരുമാനത്തെ കേന്ദ്രത്തില്‍ എങ്ങനെ അനുകൂലിക്കുന്നു എന്ന ചോദ്യം ഇവര്‍ക്ക് ഇടത് എം.പിമാരില്‍ നിന്ന് നേരിടേണ്ടിവരിയും ചെയ്തു.

കോണ്‍ഗ്രസ് എംപിമാര്‍ക്കുപുറമേ മുസ്ലിംലീഗ് എംപിമാരായ ഇ അഹമ്മദ്, ഇ ടി മുഹമ്മദ് ബഷീര്‍ എന്നിവരും കേരള കോണ്‍ഗ്രസ് മാണിയുടെ ജോസ് കെ മാണിയും എഫ്ഡിഐക്ക് അനുകൂലമായി കൈയുയര്‍ത്തി. ഇതില്‍ മുസ്ലീം ലീഗ് എഫ്ഡിഐയെ അനുകൂലിയ്ക്കുന്നുവെന്ന് നേരത്തെ വ്യക്തമാക്കിയിരുന്നു. സര്‍ക്കാരിന്റെ ഭാഗമായിരിക്കെത്തന്നെ ഡിഎംകെ അംഗങ്ങള്‍ ചര്‍ച്ചയില്‍ എഫ്ഡിഐയോടുള്ള വിയോജിപ്പ് പ്രകടമാക്കിയിരുന്നു. എന്നാല്‍, കേരളത്തില്‍നിന്നുള്ള കോണ്‍ഗ്രസ് അംഗങ്ങള്‍ക്ക് അതിനു പോലും കഴിഞ്ഞില്ല.

വിദേശനിക്ഷേപം സംബന്ധിച്ച് കേരളത്തിലെ കോണ്‍ഗ്രസ് അംഗങ്ങളുടെ നിലപാട് വ്യക്തമാക്കണമെന്ന് ചര്‍ച്ചയ്ക്കിടെ പ്രതിപക്ഷ അംഗങ്ങള്‍ ആവശ്യപ്പെട്ടിരുന്നു. കേരള മുഖ്യമന്ത്രി വിദേശ നിക്ഷേപത്തെ അനുകൂലിയ്ക്കുന്നില്ലെന്ന് പ്രതിപക്ഷ നേതാവ് സുഷമ സ്വരാജ് ചര്‍ച്ചയ്ക്കിടെ ചൂണ്ടിക്കാട്ടി. പ്രതിരോധ മന്ത്രി എകെ ആന്റണി മന്ത്രിസഭയില്‍ എതിരായ നിലപാടാണ് സ്വീകരിച്ചത്. ശശി തരൂരും ഇതിന് അനുകൂലമല്ലെന്ന് സുഷമ പറഞ്ഞു.

എഫ്ഡിഐയെ എതിര്‍ക്കുന്നുവെന്ന് പറയുന്ന മുഖ്യമന്ത്രി ഉമ്മന്‍ചാണ്ടിക്കൊപ്പമാണോ അതോ കേന്ദ്രത്തിന് ഒപ്പമാണോയെന്ന് കേരളത്തിലെ കോണ്‍ഗ്രസ് എംപിമാര്‍ വ്യക്തമാക്കണമെന്ന് സഭയില്‍ പ്രമേയം അവതരിപ്പിച്ച തൃണമൂലിന്റെ സൗഗത റോയ് ആവശ്യപ്പെട്ടു. ഇതിനോട് പ്രതികരിയ്ക്കാന്‍ കേരള എംപിമാര്‍ ധൈര്യപ്പെട്ടില്ല.