ധര്മ്മടംപീഡനം: അമ്മാവന് കുഴഞ്ഞുവീണ് മരിച്ചു
കണ്ണൂര് ധര്മ്മടത്ത് പതിമൂന്നുകാരിയായ വിദ്യാര്ത്ഥിനിയെ പീഡിപ്പിച്ച സംഭവത്തിലെ പ്രതികളിലൊരാളും പീഡനത്തിനിരയായ പെണ്കുട്ടിയുടെ അമ്മാവനുമായ ആള് ജയിലില് കുഴഞ്ഞുവീണ് മരിച്ചു. ധര്മ്മടം കിഴക്കെ പാലയാട്ടെ അന്തോളി സുധീര്ബാബു(47)വാണ് ഇന്നലെ കണ്ണൂര് സെന്ട്രല് ജയിലില് കുഴഞ്ഞുവീണ് മരിച്ചത്.
ട്രെയിന് അപകടത്തില്പ്പെട്ട് ഇരുകാലുകളും മുട്ടിന് മീതെ നഷ്ടപ്പെട്ട സുധീര് ട്രെയിനില് തന്നെ ഭിക്ഷാടനം നടത്തിയാണ് ജീവിക്കുന്നത്. പെണ്കുട്ടിയെ പീഡിപ്പിച്ചെന്ന മൊഴിയെ തുടര്ന്ന് ഒളിവിലായിരുന്ന ഇയാളെ കഴിഞ്ഞ ദിവസമാണ് പൊലീസ്റ്റ് അറസ്റ്റ് ചെയ്തത്. അറസ്റ്റിലായ സുധീര്കുമാറിനെ കോടതി റിമാന്റു ചെയ്ത് ജയിലിലേക്ക് അയക്കുകയായിരുന്നു.
വികലാംഗനായതിനാല് സബ് ജയിലില് നിന്ന് കണ്ണൂര് സെന്ട്രല് ജയിലിലേക്ക് അയച്ച സുധീര് സെന്ട്രല് ജയിലില് എത്തിയപ്പോഴേക്കും കുഴഞ്ഞുവീണു. തുടര്ന്ന് ഇയാളെ കണ്ണൂര് ജനറല് ആശുപത്രിയിലെത്തിച്ചെങ്കിലും മരിക്കുകയായിരുന്നു. ധര്മ്മടത്തെ പതിമൂന്നുകാരിയെ പീഡിപ്പിച്ച സംഭവത്തില് പെണ്കുട്ടിയുടെ അച്ഛനെയും സഹോദരനെയും മറ്റൊരു അമ്മാവനെയും പൊലീസ് നേരത്തെ അറസ്റ്റ് ചെയ്തിരുന്നു. പ്രതികളെല്ലാം മദ്യത്തിനും മയക്കുമരുന്നിനും അടിമകളാണെന്നാണ് പൊലീസ് വ്യക്തമാക്കുന്നത്.
പീഡനത്തിനിരയായ പെണ്കുട്ടിയുടെ പതിനഞ്ചുകാരിയായ സഹോദരി രണ്ട് വര്ഷം മുമ്പ് തീകൊളുത്തി ആത്മഹത്യ ചെയ്ത സംഭവത്തിന് പിന്നിലും അടുത്ത ബന്ധുക്കളുടെ പീഡനമാണെന്ന് പറയപ്പെടുന്നു. ഇപ്പോള് പീഡനത്തിനിരയായ പതിമൂന്നുകാരിയും ഈ വിവരം അന്വേഷണസംഘത്തോട് വെളിപ്പെടുത്തിയതായാണ് അറിയുന്നത്.