സബ്‌സിഡി സിലിണ്ടറുകള്‍ 12 ആക്കില്ല

തിരുവനന്തപുരം: സംസ്ഥാനത്ത് സബ്‌സിഡി എല്‍പിജി സിലിണ്ടറുകളുടെ എണ്ണം ഒന്‍പതില്‍ നിന്നും പന്ത്രണ്ടാക്കി ഉയര്‍ത്തില്ലെന്ന് മുഖ്യമന്ത്രി ഉമ്മന്‍ ചാണ്ടി നിയമസഭയില്‍ അറിയിച്ചു.

സംസ്ഥാനത്ത് പത്ത് സിലിണ്ടറുകള്‍ക്ക് മുകളില്‍ ഉപയോഗിക്കുന്നത് അഞ്ചു ശതമാനം പേര്‍ മാത്രമാണ്. 70 ലക്ഷം ഗ്യാസ് കണക്ഷനുകളാണ് ഇവിടെയുള്ളത്. അതില്‍ 64 ശതമാനവും ആറ് സിലിണ്ടറിനും അതിനുതാഴെയും ഉപയോഗിക്കുന്നവരാണ്. ഏഴ്്-എട്ട് സിലിണ്ടറുകള്‍ ഉപയോഗിക്കുന്നവര്‍ 19 ശതമാനമാണ്. 10 സിലിണ്ടറുകളുകള്‍ ഉപയോഗിക്കുന്നത് 12 ശതമാനമെന്നും മുഖ്യമന്ത്രി പറഞ്ഞു.

കേന്ദ്രസര്‍ക്കാര്‍ സബ്‌സിഡി സിലിണ്ടറുകളുടെ എണ്ണം ആറായി ചുരുക്കിയപ്പോഴാണ് സംസ്ഥാന സര്‍ക്കാര്‍ മൂന്ന് സിലിണ്ടറുകള്‍ക്ക് സബ്‌സിഡി പ്രഖ്യാപിച്ചത്. കേന്ദ്രസര്‍ക്കാര്‍ ഒന്‍പത് സബ്‌സിഡി സിലിണ്ടറുകള്‍ അനുവദിക്കുമെന്ന് പ്രഖ്യാപിച്ചിട്ടുണ്ട്.

ഈ സാഹചര്യത്തില്‍ സംസ്ഥാനം മൂന്ന് സബ്‌സിഡി സിലിണ്ടറുകള്‍ അനുവദിക്കേണ്ട ആവശ്യമില്ലെന്നും മുഖ്യമന്ത്രി ചോദ്യോത്തരവേളയില്‍ അറിയിച്ചു. റേഷന്‍ സബ്‌സിഡിയാണ് ബാങ്ക് വഴി ആക്കുന്നതെന്ന് ഭക്ഷ്യമന്ത്രി അനൂപ് ജേക്കബ് ചോദ്യത്തിന് മറുപടിയായി അറിയിച്ചു.