ഇന്ദുവിന്റെ മരണം കൊലപാതകമെന്ന് തെളിഞ്ഞു
2011 ഏപ്രില് 24നാണ് കോഴിക്കോട് എന്ഐടിയില് ഗവേഷകയായിരുന്ന ഇന്ദു തീവണ്ടി യാത്രയ്ക്കിടെ ദുരൂഹസാഹചര്യത്തില് മരിച്ചത്. യാത്രയ്ക്കിടെ കാണാതായ ഇന്ദുവിനെ പിന്നീട് ആലുവാപ്പുഴയില് മുങ്ങിമരിച്ച നിലയില് കണ്ടെത്തുകയായിരുന്നു. തിരുവനന്തപുരത്തുനിന്നു പുറപ്പെട്ട മംഗലാപുരം എക്സ്പ്രസില്നിന്നാണ് ഇന്ദുവിനെ കാണാതായത്. എന്.ഐ.ടിയിലെ ഇലക്ട്രോണിക് ആന്ഡ് കമ്യൂണിക്കേഷന് വകുപ്പില് ഗവേഷകയായ ഇന്ദു അവധി കഴിഞ്ഞു നാട്ടില്നിന്നു മടങ്ങുകയായിരുന്നു. കോഴിക്കോട് ഐഐടിയില് അധ്യാപകനായിരുന്ന സുഭാഷും യാത്രയില് ഇന്ദുവിനൊപ്പമുണ്ടായിരുന്നു.
കുമാരപുരം സ്വദേശിനിയായ ഇന്ദു 2009 മുതല് ബാലരാമപുരം സ്വദേശിയുമായ സുഭാഷുമായി പ്രണയത്തിലായിരുന്നു. എന്നാല് സുഭാഷ് മറ്റൊരു ജാതിക്കാരനാണ് എന്ന കാരണത്താല് ഇന്ദുവിന്റെ വീട്ടുകാര് ഇവരുടെ വിവാഹത്തിന് വിസമ്മതിക്കുകയായിരുന്നു.
പിന്നീട് കോണ്ഗ്രസ് നേതാവ് രാജ്മോഹന് ഉണ്ണിത്താന്റെ സഹോദരിയുടെ മകന് അഭിലാഷുമായി ഇന്ദുവിന്റെ വിവാഹം നിശ്ചയിക്കുകയും ചെയ്തു. ഇതിന് ശേഷമാണ് ദുരൂഹമായ സാഹചര്യത്തില് ഇന്ദു മരണപ്പെടുന്നത്. കേസന്വേഷണത്തിന്റെ ആദ്യഘട്ടത്തില് തന്നെ സുഭാഷിനെ സംശമുണ്ടായിരുന്നെങ്കിലും വ്യക്തമായ തെളിവുകള് ലഭിച്ചിരുന്നില്ല.